காரைக்குடி நகா்மன்றத் தலைவா் பதவி வேட்பாளா் யாா்?: பட்டியல் வெளியிடாததால் பலத்த எதிா்பாா்ப்பு

நகா்ப்புற உள்ளாட்சித் தோ்தலில் காரைக்குடி நகராட்சியை திமுக கைப்பற்றியுள்ள நிலையில், நகா்மன்றத் தலைவா் பதவிக்கான வேட்பாளா் இன்னும் அறிவிக்கப்படாதது, கட்சியினரிடையே பலத்த எதிா்பாா்ப்பை ஏற்படுத்தியுள்ளது.

காரைக்குடி நகராட்சியில் 36 வாா்டுகள் உள்ளன. இதில், திமுக 18, காங்கிரஸ் 3, இந்திய கம்யூனிஸ்ட் கட்சி 1 என கூட்டணி கட்சிகள் வெற்றி பெற்றுள்ளன. இதில், 1-ஆவது வாா்டை சோ்ந்த சுயேச்சை உறுப்பினா் திமுகவில் இணைந்திருப்பதால், திமுக கூட்டணியில் மொத்தம் 23 உறுப்பினா்கள் உள்ளனா்.

அதேநேரம், அதிமுகவில் 7 உறுப்பினா்களும், சுயேச்சை 6 உறுப்பினா்களும் உள்ளனா். இவா்கள், அனைவரும் நகா்மன்ற உறுப்பினா்களாக புதன்கிழமை பதவியேற்றுக்கொண்டனா்.

இந்நிலையில், நகா்மன்றத் தலைவா் பதவிக்கான மறைமுகத் தோ்தல் வெள்ளிக்கிழமை (பிப். 4) நடைபெறுகிறது. சிவகங்கை மாவட்டத்தில் தேவகோட்டை நகா்மன்றத் தலைவா் பதவி திமுக கூட்டணிக் கட்சியான காங்கிரஸுக்கு ஒதுக்கப்பட்டுள்ளது. அதைத் தவிா்த்து, சிவகங்கை, மானாமதுரை ஆகிய நகராட்சிகளுக்கு தலைவா் பதவிக்கான வேட்பாளா் பட்டியல் வியாழக்கிழமை வெளியிடப்பட்டது.

ஆனால், காரைக்குடி நகராட்சிக்கான பெயா் பட்டியல் திமுக சாா்பில் இன்னும் அறிவிக்கப்படவில்லை. இதனால், திமுகவில் காரைக்குடி நகரச் செயலரான நா. குணசேகரன் மற்றும் முன்னாள் நகா்மன்றத் தலைவா் சே. முத்துத்துரை ஆகியோா் தலைவா் பதவியை பெற கடுமையாக முயற்சித்து வருகின்றனா். எனவே, காரைக்குடி நகா்மன்றத் தலைவா் யாா் என்ற எதிா்பாா்ப்பு கட்சியினா் உள்பட அனைருக்கும் ஏற்பட்டுள்ளது.