முல்லைப் பெரியாறு அணை நீர்மட்டத்தை 142 அடியாக உயர்த்த வேண்டும்: விவசாயிகள் கோரிக்கை

முல்லைப் பெரியாறு அணையில் 142 அடி தண்ணீரைத் தேக்க தமிழக அரசு நடவடிக்கை எடுக்க வேண்டும் என்று 5 மாவட்ட விவசாயிகள் கோரிக்கை விடுத்துள்ளனர்.

முல்லைப் பெரியாறு அணையில் ஞாயிற்றுக்கிழமை நிலவரப்படி அணையின் நீர்மட்டம், 136.80 அடி உயரமாகவும், (மொத்த உயரம் 142 அடி) அணையில் நீர் இருப்பு, 6,320 மில்லியன் கன அடியாகவும், அணைக்கு நீர்வரத்து 5,020 கன அடியாகவும், அணையில் இருந்து தமிழகத்துக்கு நீர் வெளியேற்றம் 2,200 கன அடியாகவும் உள்ளது. 

அணையின் நீர்பிடிப்பு பகுதியான பெரியாற்றில் 71.4 மில்லி மீட்டர் மழையும், தேக்கடி ஏரியில் 16.4 மில்லி மீட்டர் மழையும் பெய்ததால், அணைக்குள் நீர்வரத்து சனிக்கிழமை விநாடிக்கு 3,011 கனஅடியாக வந்தது. ஞாயிற்றுக்கிழமை 5,020 கனஅடியாக வந்தது, அதாவது 2 ஆயிரம் கனஅடி தண்ணீர் அதிகமாக அணைக்குள் வந்தது, இதன் காரணமாக அணையின் நீர்மட்டம் 136.80 அடி உயரத்தை எட்டியது.

இதையும் படிக்க- நாளை வழக்கம்போல் தடுப்பூசி முகாம்கள் இயங்கும்: அமைச்சர் மா.சுப்பிரமணியன்

அணையின் நீர்மட்டம் 136 அடிக்கு மேல் உயர்ந்ததால் பெரியாற்றில் கரையோர பகுதிகளில் வசிக்கும் மக்களுக்கு முதல்கட்ட வெள்ள அபாய எச்சரிக்கையை பொதுப்பணித்துறையினர் அறிவித்துள்ளனர். கரையோரப் பகுதிகளில் உள்ள பொதுமக்கள் பாதுகாப்பான இடங்களுக்கு செல்லுமாறு வருவாய்த்துறை மற்றும் போலீசார் தண்டோரா மற்றும் ஒலிபெருக்கி மூலம் அறிவிப்பு செய்து வருகின்றனர்.

5 மாவட்ட விவசாய சங்க தலைவர் கே.எம். அப்பாஸ் கூறுகையில், உச்சநீதிமன்றம் முல்லைப் பெரியாறு அணையில் 142 அடியை தேக்க உத்தரவிட்டுள்ளது, தற்போது தமிழகப் பகுதிக்கு தென்மேற்கு மற்றும் வடகிழக்கு பருவமழை பெய்து உள்ள நிலையில், வைகை அணையில் போதுமான தண்ணீர் இருப்பு உள்ளது. இதனால் பெரியாறு அணையில் இருந்து தமிழகத்துக்கு திறந்து விடும் தண்ணீரின் அளவை குறைத்து அணையில் 142 அடி உயரம் தண்ணீரைத் தேக்க  தமிழக அரசு நடவடிக்கை  எடுக்க வேண்டும் என்றார்.

இதுதொடர்பாக தமிழக முதல்வருக்கு கோரிக்கை மனுக்கள் அனுப்பியுள்ளார்.