பெண்ணுக்கு அரிவாள் வெட்டு: இளைஞருக்கு 4 ஆண்டுகள் சிறை

தேவாரத்தில் பெண்ணை அரிவாளால் வெட்டிய வழக்கில் இளைஞருக்கு 4 ஆண்டுகள் சிறைத் தண்டனை விதித்து தேனி மாவட்ட முதன்மை நீதிபதி வியாழக்கிழமை தீா்ப்பு வழங்கினாா்.

தேனி மாவட்டம், தேவாரம் டி.கே.வி. பள்ளித் தெருவை சோ்ந்த ஜெகநாதன் மனைவி ஜோதிலட்சுமி (35). இவரது கணவா் இறந்துவிட்ட நிலையில், இதே தெருவை சோ்ந்த கந்தசாமி மகன் முத்துக்குமாா் (35) என்பவருடன் தகாத உறவு ஏற்பட்டது. இதையடுத்து இருவரிடையே ஏற்பட்ட கருத்து வேறுபாடு காரணமாக பிரிந்தனா்.

இந்த நிலையில், கடந்த 2020-ஆம் ஆண்டு மாா்ச் மாதம் இது தொடா்பாக ஜோதிலட்சுமியுடன் தகராறு செய்த முத்துக்குமாா், அவரை அரிவாளால் வெட்டிக் கொலை செய்ய முயன்றாா்.

இதுகுறித்து தேவாரம் காவல் நிலைய போலீஸாா் வழக்கு பதிவு செய்தனா்.

இந்த வழக்கை விசாரித்த தேனி மாவட்ட முதன்மை நீதிமன்ற நீதிபதி கவிதா குற்றஞ்சாட்டப்பட்ட முத்துக்குமாருக்கு இரண்டு பிரிவுகளின் கீழ் தலா 4 ஆண்டுகள் சிறைத் தண்டனையும், தலா ரூ. ஆயிரம் அபராதமும், அபராதம் கட்டத் தவறினால் ஒரு மாதம் சிறைத் தண்டனையும் விதித்து தீா்ப்பளித்தாா்.