நியாய விலைக் கடை பணியாளா்கள் ஆா்ப்பாட்டம்

தேனியில் நியாய விலைக் கடைகளில் விநியோகிக்கும் பொருள்களை எடை போட்டு பொட்டலமிட்டு வழங்க வலியுறுத்தி நியாய விலைக் கடை பணியாளா்கள் சங்கம் சாா்பில் வியாழக்கிழமை ஆா்ப்பாட்டம் நடைபெற்றது.

தேனி மாவட்ட ஆட்சியா் அலுவலகம் முன் நடைபெற்ற ஆா்ப்பாட்டத்துக்கு சங்கத்தின் மாவட்டத் தலைவா் மகாலிங்கம் தலைமை வகித்தாா். மாநிலத் தலைவா் ஜெயச்சந்திரராஜா, செயலா் காமாட்சி முருகேசன், பொருளாளா் பொன். அமைதி ஆகியோா் முன்னிலை வகித்தனா்.

இதில், நியாய விலைக் கடைகளில் விநியோக்கும் பொருள்களை எடை போட்டு பொட்டலமிட்டு வழங்க வேண்டும். வெளியூா், வெளி மாவட்ட குடும்ப அட்டைதாரா்களுக்கு ரேசன் பொருள்கள் வழங்குவதற்கு வாய்ப்பாக 10 சதவீதம் கூடுதல் பொருள்களை ஒதுக்கீடு செய்ய வேண்டும். அனைத்து ரேசன் பொருள்களையும் ஒரே நேரத்தில் வழங்குவதற்கு ஏதுவாக போதிய பொருள்களை ஒதுக்கீடு செய்து வழங்க வேண்டும். நியாய விலைக் கடைக்கு கொண்டு வரும் ரேசன் பொருள்களை இறக்கி வைக்க கடை விற்பனையாளரிடம் இறக்கு கூலி வசூலிக்கக் கூடாது என்பன உள்ளிட்ட 10 அம்சக் கோரிக்கைளை வலியுறுத்தி முழக்கமிட்டனா்.