விருதுநகரில் காவலர் வீட்டின் கதவை உடைத்து 10 பவுன் நகை திருட்டு

விருதுநகரில் புதன்கிழமை இரவு காவலர் வீட்டு கதவை உடைத்து பீரோவிலிருந்த 10 பவுன் தங்க நகையை மர்ம நபர்கள் திருடிச் சென்றனர்.
 விருதுநகர் அம்பேத்கர் நகரைச் சேர்ந்தவர் மாணிக்கவாசகம்(36). இவர், வச்சகாரபட்டி காவல் நிலையத்தில்  காவலராக பணி புரிந்து வருகிறார். இவரது மனைவி பிரசவத்திற்காக தாய் வீட்டிற்கு சென்று விட்டதாக கூறப்படுகிறது. 
இந்நிலையில் வீட்டை பூட்டி விட்டு புதன்கிழமை மாணிக்கவாசகம் பணிக்குச் சென்றுள்ளார். மீண்டும் பணி முடிந்து அன்றைய தினம் நள்ளிரவு வீட்டிற்கு வந்துள்ளார். அப்போது, வீட்டின் கதவு உடைக்கப்பட்டிருப்பது தெரிந்தது. இதையடுத்து அவர் உள்ளே சென்று பார்த்த போது, பீரோவிலிருந்த 10 பவுன் நகையை மர்ம நபர்கள் திருடியிருப்பது தெரிந்தது. இது குறித்து அவர் அளித்த புகாரின் பேரில் பாண்டியன் நகர் போலீஸார் வழக்குப் பதிந்து விசாரணை மேற்கொண்டு வருகின்றனர்.