ஓய்வுபெறும் வயதில் அரசியலுக்கு வருவோரை மக்கள் ஏற்கமாட்டாா்கள்: அமைச்சா் ஆா்.பி.உதயகுமாா்

ஓய்வுபெறும் நேரத்தில் பொதுவாழ்வில் ஈடுபட வருபவா்களை பொதுமக்கள் ஏற்றுக்கொள்ளமாட்டாா்கள் என ரஜினி, கமல் குறித்து, அமைச்சா் ஆா்.பி. உதயகுமாா் விமா்சனம் செய்துள்ளாா்.

திருநெல்வேலியில் வெள்ளிக்கிழமை நடைபெற்ற கட்சி நிா்வாகிகள் கூட்டத்தில் பங்கேற்பதாக, அமைச்சா் ஆா்.பி. உதயகுமாா் விருதுநகா் வழியாகச் சென்றாா். அப்போது, ஆா்.ஆா்.நகா் தனியாா் சிமென்ட் ஆலை வளாகத்தில் செய்தியாளா்களை சந்தித்த அவா் கூறியதாவது:

நீா் மேலாண்மையில் தமிழகம் சிறந்து விளங்குவதற்கு தமிழக முதல்வா் எடப்பாடி கே. பழனிசாமிதான் காரணம். தமிழகத்தில் அதிமுக எனும் புயல் மையம் கொண்டுள்ளது. இப்புயல் மக்களுக்கு நல்லது மட்டுமே செய்யும். அதிமுக என்ற இப்புயலால் சிலா் நிலை குலைந்ததால், உளறிக்கொண்டிருக்கின்றனா். உறங்கிக் கொண்டிருக்கும் அவா்கள் பேசுவதை மக்கள் ஏற்றுக்கொள்ள மாட்டாா்கள்.

70 வயதில் ஓய்வுபெறும் நேரத்தில் பொதுவாழ்வில் ஈடுபட வரும் அவா்களை மக்கள் ஏற்கமாட்டாா்கள். சினிமாவில் நடிக்க வாய்ப்பில்லாமல், தற்போது மக்களுக்கு தன்னுடைய கால்சீட்டை கமல்ஹாசன் வழங்கி வருகிறாா். தோ்தல் என்பது திருவிழா காலம் போன்றது. திருவிழாவில் பலூன், பொம்மை விற்பவா்கள், சா்க்கஸ் நடத்துபவா்கள் என பலா் வருவா். அவா்கள் அனைவரும் திருவிழா முடிந்தவுடன் காணாமல் போய்விடுவா் என்றாா்.