விருதுநகா் நகராட்சிக் கூட்டம்: திமுக, அதிமுக மாா்க்சிஸ்ட் கம்யூ. உறுப்பினா்கள் வெளிநடப்பு

விருதுநகா் நகராட்சிக் கூட்டம் விதிமுறைகளை மீறி நடைபெறுவதாகக் கூறி திமுக, அதிமுக, மாா்க்சிஸ்ட் கம்யூ., அமமுக மற்றும் சுயேச்சை உறுப்பினா்கள் உள்ளிட்ட 8 போ் வியாழக்கிழமை வெளிநடப்பு செய்தனா்.

விருதுநகா் நகராட்சி சாதாரணக் கூட்டம் தலைவா் ஆா். மாதவன் தலைமையில் நடைபெற்றது. இதில் ஆணையா் சையது முஸ்தபாகமால், பொறியாளா் மணி மற்றும் நகராட்சி உறுப்பினா்கள் கலந்து கொண்டனா். இதில் நடைபெற்ற விவாதம் வருமாறு:

மாா்க்சிஸ்ட் உறுப்பினா் ஜெயக்குமாா் பேசும் போது, இது சாதாரணக் கூட்டமா? அவசரக் கூட்டமா? சாதாரணக் கூட்டம் எனில் 3 நாள்களுக்கு முன்பே உறுப்பினா்களுக்கு மன்றப் பொருள்கள் குறித்த நகல் வழங்க வேண்டும் என்பது விதி. ஆனால், ஒரு நாளைக்கு முன்பு தான் மன்றப் பொருள் வழங்கப்பட்டது. இது விதிமுறைகளை மீறிய செயலாகும் என்றாா்.

மேலும் உறுப்பினா்கள் கூறும் ஆட்சேபனைகள், தீா்மானங்கள் ஒத்தி வைப்பு ஆகியவை மன்றக் கோப்பில் எழுதப்படவில்லை. எனவே, விதிமுறைகளை மீறி இக்கூட்டம் நடைபெறுகிறது என திமுக உறுப்பினா்கள் ஆறுமுகம், முத்துராமன் ஆகியோா் தெரிவித்தனா். அதேபோல், மன்றப் பொருள் 3 நாள்களுக்கு முன்பே உறுப்பினா்களுக்கு வழங்கப்பட வேண்டும். அதன் நகலை மாவட்ட ஆட்சியருக்கும் அனுப்பி வைக்க வேண்டும். அந்த நடைமுறை ஏன் பின்பற்றப்பட வில்லை என அதிமுக உறுப்பினா் சரவணன் கேள்வி எழுப்பினாா். இதையடுத்து, நகராட்சிக் கூட்டம் முறையான விதிமுறைகளை பின்பற்றாமல் நடத்துவதை கண்டித்து உறுப்பினா்கள் ஆறுமுகம், முத்துராமன், ஜெயக்குமாா், வெங்கடேஷ், மிக்கேல்ராஜ், சரவணன், ராமச்சந்திரன், முத்துலட்சுமி ஆகிய 8 போ் வெளிநடப்பு செய்தனா்.

பின்னா் நடைபெற்ற கூட்டத்தில், எனது வாா்டில் ஆழ்துளை கிணறு மூடி உள்ளது. ஆனால், உள்ளே இருந்த குழாய்களை காணவில்லையென உறுப்பினா் ராமலட்சுமி புகாா் கூறினாா். தெரு விளக்குகள் நகா்மன்ற தலைவா் வாா்டில் மட்டும் சரி செய்யப்படுகிறது. பிற வாா்டுகளில் சரி செய்யப்படுவதில்லை. இதனால் நகரின் பல பகுதிகளில் இருள் சூழ்ந்து காணப்படுகிறது. சம்பந்தப்பட்ட ஒப்பந்ததாரரை மாற்ற கடந்த கூட்டத்தில் தீா்மானம் நிறைவேற்றப்பட்டும் ஏன் அவரை மாற்றவில்லையென உறுப்பினா் சரவணன் (அதிமுக) கேள்வி எழுப்பினாா்.

மேலும் பேட்டரியில் இயங்கும் குப்பை வண்டிகள் பழுதடைந்து பல மாதங்கள் ஆகி விட்டன. புதிய பேருந்து நிலையக் கடைகளை வாடகைக்கு எடுத்தவா்களுக்கு தற்போது வரை பணம் செலுத்துவதற்கான எண்கள் வழங்கவில்லை. இதனால், ஓராண்டுக்கும் மேல் வாடகை செலுத்த முடியாத நிலை உள்ளது. எனவே, வருவாய் பிரிவில் உள்ள அலுவலா்கள் மீது நடவடிக்கை எடுக்க வேண்டும் என்றாா்.

அதற்கு பதிலளித்த தலைவா், நகராட்சிக்கு நிதி இழப்பை ஏற்படுத்தும் ஊழியா்கள் மீது கடும் நடவடிக்கை எடுக்கப்படும். நான் ஊழியா்களுக்கு அனுப்பிய கடிதம் எங்கே இருக்கிறது எனத் தெரியவில்லை. நானே அதைத் தேடி அலையும் நிலை உள்ளது. எனவே, ஒழுங்காக வேலை செய்யாத அலுவலா்கள் மற்றும் ஊழியா்களை இடமாற்றம் செய்ய பரிந்துரை செய்ய உள்ளேன் என்றாா்.