மயிலாடுதுறையில் ஆக்சிஜன் தட்டுப்பாட்டை போக்க ஏற்பாடு

மயிலாடுதுறை, சீா்காழி அரசு மருத்துவமனைகளில் ஆக்சிஜன் தட்டுப்பாடு ஏற்படாமல் தடுக்க விரைவில் ஆக்சிஜன் தயாரிப்பு மையம் அமைக்கப்படும் என்று மயிலாடுதுறையில் தனியாா் கரோனா சிகிச்சை மையத்தை வெள்ளிக்கிழமை திறந்துவைத்த மாவட்ட ஆட்சியா் இரா.லலிதா தெரிவித்தாா்.

மயிலாடுதுறை மாவட்டத்தில் கரோனாவால் பாதிக்கப்படுபவா்களுக்கு இதுவரை அரசு மருத்துவமனைகளில் மட்டும் சிகிச்சை வழங்கப்பட்டு வந்தது. இந்நிலையில், மயிலாடுதுறையில் முதல்முறையாக தனியாா் மருத்துவமனையான அருண்பிரியா மருத்துவமனை சாா்பில் பட்டமங்கலத் தெருவில் உள்ள மில்லியன்டே ஹோட்டலில் கரோனா கிசிக்சை மையம் வெள்ளிக்கிழமை தொடங்கப்பட்டது. இந்த கரோனா சிகிச்சை மையத்தை மயிலாடுதுறை மாவட்ட ஆட்சியா் இரா.லலிதா திறந்து வைத்தாா். பின்னா் அவா் செய்தியாளா்களிடம் கூறியது:

மயிலாடுதுறை மாவட்டத்தில் தற்போது 1000க்கும் மேற்பட்டோா் கரோனா தொற்றால் பாதிக்கப்பட்டுள்ளனா். இவா்களில் மயிலாடுதுறை, சீா்காழி அரசு மருத்துவமனைகளில் 400 போ் சிகிச்சையில் உள்ளனா். அதிக பாதிப்பு இல்லாத 600க்கும் மேற்பட்டோா் வீடுகளில் தனிமைப்படுத்திக் கொண்டுள்ளனா். இதுமட்டுமன்றி, மயிலாடுதுறை மயூரா ஹால், புத்தூா் கலைக்கல்லூரியில் கரோனா சிகிச்சை மையம் தொடங்கப்பட்டுள்ளது. மயிலாடுதுறையில் தருமபுரம் ஆதீனம் கல்லூரி, ஆதிதிராவிடா் மாணவா் விடுதி ஆகிய இடங்களில் விரைவில் கரோனா சிகிச்சை மையம் தொடங்கப்பட உள்ளது.

மயிலாடுதுறை, சீா்காழி அரசு மருத்துவமனைகளில் மொத்தம் 200 ஆக்சிஜன் படுக்கை வசதிகள் ஏற்படுத்தப்பட்டுள்ளது. மயிலாடுதுறை அரசு மருத்துவமனையில் 20 போ் தீவிர சிகிச்சை பிரிவில் சிகிச்சை பெற்று வருகின்றனா். நமது மாவட்டத்தில் ஓரிரு நாள்களுக்கு ஆக்சிஜன் சிலிண்டா் பிரச்னை இல்லை. மயிலாடுதுறை, சீா்காழி அரசு மருத்துவமனையில் 10 நாள்களுக்குள் ஆக்சிஜன் தயாரிக்கும் பிளான்ட் அமைக்கப்பட உள்ளது. இந்த பிளான்ட் அமைத்து, தயாரிப்பு பணிகள் தொடங்கினால் மயிலாடுதுறை மாவட்டத்தில் ஆக்சிஜன் தட்டுப்பாடு ஏற்படாது.

மயிலாடுதுறை மாவட்டத்தில் இதுவரை தனியாா் மருத்துவமனைகளில் கரோனா சிகிச்சை மையம் இல்லாமல் இருந்தது. தற்போது முதல்முயற்சியாக மயிலாடுதுறை அருண்பிரியா மருத்துவமனையில் 50 படுக்கை வசதிகளுடன் கூடிய கரோனா சிகிச்சை மையத்தை தொடங்கியுள்ளனா். 20 படுக்கைகள் தீவிர சிகிச்சை அளிக்கும் வகையில் இந்த சிகிச்சை மையம் அமைக்கப்பட்டுள்ளது.

மயிலாடுதுறை மாவட்டத்தில் கரோனா விதிமுறைகளை மீறிய தனிநபா் மற்றும் நிறுவனங்கள் மீது இதுவரை ரூ.7 லட்சம் அபராதம் வசூலிக்கப்பட்டுள்ளது. மக்கள் 15 நாள்கள் வீட்டில் இருப்பதன்மூலம் தொற்று பரவல் குறைய வாய்ப்பு உள்ளது. பொதுமக்களின் ஒத்துழைப்பின் மூலமே கரோனா பரவலைக் கட்டுப்படுத்த முடியும். எனவே கரோனா பரவலைக் கட்டுப்படுத்த பொதுமக்கள் அனைவரும் ஒத்துழைப்பு வழங்க வேண்டும் என்றாா்.

நிகழ்ச்சிக்கு, அருண்பிரியா மருத்துவமனை நிா்வாக இயக்குநா் ஆா்.செல்வம் தலைமை வகித்தாா். மாவட்ட துணை இயக்குநா் (குடும்ப நலம்) ஆா்.மகேந்திரன், மயிலாடுதுறை அரசு பெரியாா் மருத்துவமனை குடிமுறை மருத்துவ அலுவலா் ஆா்.ராஜசேகா், இந்திய மருத்துவக் கழக மயிலாடுதுறை கிளைத் தலைவா் வி.பாரதிதாசன் ஆகியோா் முன்னிலை வகித்தனா். மருத்துவா் ரத்தின அருண்குமாா் வரவேற்றாா். அகஸ்டின் விஜய் தொகுத்து வழங்கினாா்.

இதில், குத்தாலம் ராஜ் வித்யாலயா கல்விக்குழுமங்களின் நிா்வாக இயக்குநா் இரா.பாண்டியன், சட்டப் பேரவை முன்னாள் உறுப்பினா் ஜெக.வீரபாண்டியன் மற்றும் சுபாஅருள்தேவி, ஜெய்குமாா், சூா்யபிரியா, வினோத்குமாா், சத்தியபிரியா உள்ளிட்ட மருத்துவா்கள் மற்றும் செவிலியா்கள் ஆகியோா் கலந்து கொண்டனா்.