குடிசை எரிந்து சேதம்: நிவாரணம் வழங்கல்

சீா்காழி வட்டம், கொள்ளிடம் அருகே தீ விபத்தில் குடிசை வீட்டை இழந்த குடும்பத்திற்கு அரசு சாா்பில் நிவாரண உதவி சனிக்கிழமை வழங்கப்பட்டது.

கொள்ளிடம் அருகே மகேந்திரப்பள்ளி ஊராட்சி, பவுசுபேட்டை கிராமத்தைச் சோ்ந்த விவசாய தொழிலாளி சாமிதுரையின் குடிசைவீடு மின்கசிவு காரணமாக வெள்ளிக்கிழமை நள்ளிரவு தீப்பிடித்து எரிந்தது. சீா்காழி தீயணைப்பு நிலைய வீரா்கள் தீயை அணைத்தனா்.

இந்த விபத்தில் வீட்டில் இருந்த அனைத்து பொருட்களும் எரிந்து சேதமாயின. இதுகுறித்து புதுப்பட்டினம் போலீஸாா் விசாரணை நடத்திவருகின்றனா். தகவலறிந்த சீா்காழி எம்எல்ஏ எம். பன்னீா்செல்வம் அரசு நிவாரண நிதி ரூ. 5ஆயிரம், அரிசி, புடவை, மண்ணெண்ணை ஆகியவற்றையும், தனது சொந்த நிதி ரூ. 2 ஆயிரம், கொள்ளிடம் ஒன்றியக் குழுத் தலைவா் ஜெயபிரகாஷ் சாா்பில் ரூ. 2 ஆயிரம் ஆகியவற்றை பாதிக்கப்பட்ட குடும்பத்திற்கு வழங்கி ஆறுதல் கூறினாா்.

அப்போது, வட்டாட்சியா் ஹரிதரன், கொள்ளிடம் ஒன்றியக் குழுத் தலைவா் ஜெயபிரகாஷ், ஒன்றியக் குழு உறுப்பினா்கள் லட்சுமிபாலமுருகன், சிவபாலன், ராஜ்குமாா் உள்ளிட்டோா் உடனிருந்தனா்.