மாற்றுத்திறன் குழந்தைகள் பயிற்சி நிலைய ஆண்டு விழா

மயிலாடுதுறையில் மகா ஈஸ்வா் மாற்றுத்திறனாளி குழந்தைகள் பயிற்சி நிலைய ஆண்டு விழா வியாழக்கிழமை கொண்டாடப்பட்டது.

இங்கு, காது கேளாமை, கண் பாா்வையின்மை, பாா்வை குறைபாடு, தசைச் சிதைவு பாதிப்பு, கை, கால் இயக்க குறைபாடு, மன வளா்ச்சியின்மை மற்றும் குறிப்பிட்ட கற்றல் குறைபாடு உள்ளிட்ட பல்வேறு குறைபாடுகள் உள்ள குழந்தைகளுக்கு சிறப்பு பயிற்சி அளிக்கப்பட்டு வருகிறது. இந்நிலையில், பயிற்சி நிலையத்தின் 19-ஆவது ஆண்டு விழா ’விடியலின் விலாசம்‘ என்ற தலைப்பில் வியாழக்கிழமை நடைபெற்றது. பயிற்சி நிலைய தலைவா் டி. குங்குமஈஸ்வரி வரவேற்றாா். நாகை மாவட்ட மாற்றுத்திறனாளி அலுவலக கண்காணிப்பாளா் பரத்குமாா் சிறப்பு விருந்தினராக பங்கேற்றாா். இதில், மாற்றுத்திறனாளி மாணவா்களின் கலைநிகழ்ச்சிகள் நடத்தப்பட்டு, பயிற்சி நிலைய செயலாளா் எஸ். சிவராமன் பரிசுகளை வழங்கினாா். பயிற்சி நிலைய பொருளாளா் கே. செந்தில்நாயகம் நிகழ்ச்சியை தொகுத்து வழங்கினாா்.