முத்துப்பேட்டை ரயில் நிலைய தகுதிக்குறைப்பு விவகாரம்:திருச்சி சிவா எம்பியிடம் கோரிக்கை மனு

திருவாரூர் மாவட்டம், முத்துப்பேட்டை ரயில் நிலைய தரக்குறைப்பு முடிவை மறுபரிசீலனை செய்யுமாறு ரயில்வே அமைச்சரிடம் முறையிடக் கோரி, ஜாம்பவானோடை தர்கா நிர்வாக அறங்காவலர் எஸ்.எஸ். பாக்கர் அலிசாகிப் அலி தலைமையிலான குழுவினர், திமுக மாநிலங்களவை உறுப்பினர் திருச்சி சிவாவிடம் அண்மையில் கோரிக்கை மனு அளித்தனர்.
அந்த மனுவில் கூறியிருப்பது:
ஆங்கிலேயர் ஆட்சிக்காலத்தில் உருவாக்கப்பட்ட முத்துப்பேட்டை ரயில் நிலையம், உலகப் புகழ்பெற்ற தர்கா மற்றும் பிரசித்தி பெற்ற கோயில்கள் உள்பட பல்வேறு வழிப்பாட்டு தலங்கள், லகூன் மற்றும் அலையாத்திக் காடுகள் உள்ளிட்ட சுற்றுலா தலங்களால் ரயில்வே துறைக்கு அதிக லாபத்தை பெற்று தந்தது. 
இந்நிலையில், கடந்த 7 ஆண்டுகளுக்கு முன்பு அகல ரயில் பாதை பணிக்காக இப்பகுதியில் ரயில் சேவை நிறுத்தப்பட்டது.
பணிகள் தற்போது முழுவீச்சில் நடைபெற்று வரும் நிலையில், 'பி' கிரேடாக இருந்த முத்துப்பேட்டை ரயில் நிலையத்தை தரம் குறைத்து, 'டி' கிரேடாக மாற்ற தென்னக ரயில்வே முயற்சித்து வருகிறது. இதன்மூலம் இப்பகுதிக்கு வரும் ரயில்கள் வெறும் 2 நிமிடங்கள் மட்டுமே நின்று செல்லும் வகையிலும், நிலைய மேலாளர் இல்லாத ரயில் நிலையமாகவும் முத்துப்பேட்டை உருவாகும்.
இதனால், இப்பகுதி மக்களுக்கும், வியாபாரிகளுக்கும், சுற்றுலா பயணிகளுக்கும் பல்வேறு இடர்கள் ஏற்படும். எனவே, முத்துப்பேட்டை ரயில் நிலைய தகுதி குறைப்பு விவகாரத்தை சம்பந்தப்பட்ட ரயில்வே அமைச்சகத்தின் கவனத்துக்குக் கொண்டு செல்ல வேண்டும் என்று கூறப்பட்டுள்ளது.
மனுவைப் பெற்றுக்கொண்ட திருச்சி சிவா எம்பி, இந்த கோரிக்கைகளை ரயில்வே அமைச்சரின் கவனத்துக்குக் கொண்டு சென்று, நிறைவேற்ற முயற்சிப்பதாக  உறுதி அளித்துள்ளார்.