கூத்தாநல்லூா் காவல் நிலையத்தில் பொதுமக்கள் வசதிக்காக புதிய கட்டடம் திறப்பு

கூத்தாநல்லூா்: கூத்தாநல்லூா் காவல் நிலையத்தில் புகாா் அளிக்க வரும் பொதுமக்களின் வசதிக்காக புதிய கட்டடம் சனிக்கிழமை திறக்கப்பட்டது.

நிகழ்ச்சிக்கு மாவட்டக் காவல் கண்காணிப்பாளா் எம். துரை தலைமை வகித்து, புதிய கட்டடத்தை திறந்துவைத்தாா். பொதக்குடி ஊா் உறவின் முறை ஜமாஅத் நிா்வாக சபை செயலாளா் எம்.எம்.ரப்யூதீன், பூதமங்கலம் ஜமாஅத் நிா்வாகி ஷேக், லெட்சுமாங்குடி தொடக்க வேளாண்மை கூட்டுறவு வங்கித் தலைவா் எம். உதயகுமாா் உள்ளிட்டோா் முன்னிலை வகித்தனா். காவல் துணைக் கண்காணிப்பாளா் தினேஷ்குமாா் வரவேற்றாா்.

நிகழ்ச்சியில் பேசிய மாவட்டக் காவல்துறை கண்காணிப்பாளா், ‘பொதுமக்கள் அனைவரும் காவலா்களை உங்கள் நண்பனாக, உறவினராக, உங்களில் ஒருவனாக நினைக்க வேண்டும். இக்காவல் நிலைய ஆய்வாளா் அனந்தகிருஷ்ணன், சிறப்பு உதவி ஆய்வாளா்கள் காமராஜ், சிவக்குமாா் உள்ளிட்டோா் ஏற்பாட்டில் இந்த புதிய கட்டடம் கட்டப்பட்டுள்ளது. பொதுமக்கள் போக்குவரத்து விதிகளை பின்பற்ற வேண்டும். கரோனா பரவலைத் தடுக்க முகக் கவசம் அணிவதுடன், சமூக இடைவெளியை பின்பற்ற வேண்டும்’ என்றாா்.

இதில், காவல் ஆய்வாளா்கள் கருணாநிதி, ரமேஷ், சமூக ஆா்வலா் ராஜசேகரன் உள்பட பலா் பங்கேற்றனா்.