"தூய்மையே உண்மையான சேவை': மோடியின் புதிய திட்டம்

மகாத்மா காந்தியின் 150-ஆவது பிறந்த தினத்தை முன்னிட்டு வரும் 15-ஆம் தேதி முதல் "தூய்மையே உண்மையான சேவை' என்ற இயக்கம் செயல்படுத்தப்படுவதாக பிரதமர் நரேந்திர மோடி அறிவித்துள்ளார்.
இதுதொடர்பாக புதன்கிழமை அவர் வெளியிட்டுள்ள விடியோ பதிவில் கூறியுள்ளதாவது: "தூய்மையே உண்மையான சேவை' இயக்கம் தொடங்கிய பிறகு, தூய்மை இந்தியா திட்டத்தில் சிரத்தையோடு களத்தில் இறங்கி பணியாற்றியவர்களுடன் கலந்துரையாட ஆர்வத்துடன் உள்ளேன். "தூய்மையே உண்மையான சேவை' இயக்கமானது, மகாத்மா காந்திக்கு மரியாதை செலுத்த ஓர் சிறந்த வழியாகும்.
வரும் அக்டோபர் 2-ஆம் தேதி மகாத்மா காந்தியின் 150-ஆவது பிறந்த தினம் கொண்டாடப்படும்போது, தூய்மை இந்தியா திட்டம் தொடங்கி 4 ஆண்டுகள் நிறைவடைந்திருக்கும்.
தூய்மை இந்தியா என்ற அந்த மிகப்பெரிய இயக்கமானது, "சுத்தமான இந்தியா' என்ற காந்தியின் கனவை நனவாக்குவதை இலக்காகக் கொண்டதாகும் என்று பிரதமர் மோடி அந்த விடியோ பதிவில் கூறியுள்ளார்.