ராகுல் காந்தி ஒரு மன நோயாளி:  இளைஞர் பாஜக தலைவர்

பிரதமர் ஆவதற்கு கனவு காணும் ராகுல் காந்தி ஒரு மன நோயாளி என்று பாஜக இளைஞர் அமைப்பான "பாரதிய ஜனதா யுவ மோர்ச்சா'வின் தேசிய செயலர் அபிஜாத் மிஸ்ரா விமர்சித்துள்ளார்.
குஜராத் மாநிலம் ஆமதாபாதில் கட்சித் தொண்டர்களிடையே அவர் உரையாற்றியதாவது: 
ராகுல் காந்தி காங்கிரஸ் தலைவராக இருக்கும் வரையில் பாஜக கவலைப்படத் தேவையில்லை. அவரை கட்சியின் தலைவராக்கியதற்காக காங்கிரஸுக்கு நன்றி தெரிவித்துக் கொள்கிறேன்.
ராகுல் காந்தி, பிரதமர் மோடியுடன் போட்டிபோட விரும்புகிறார். ஒரு மன நோயாளி, வசதியான குடும்பத்தைச் சேர்ந்தவர், பிரதமர் ஆகும் கனவுடன் இருக்கிறார். ஒரு சிறிய பானையில் வளரும் செடி போல இருக்கும் சிலர், ஆலமரமாக வளர நினைக்கின்றனர். அத்தகைய முட்டாள்கள் பிரதமராக விரும்புகின்றனர்.
இன்றைய இளைஞர்கள், ஷாருக் கான், சல்மான் கான், ஆமிர் கான் போன்ற பாலிவுட் நடிகர்களை தங்களது முன்மாதிரியாக எடுத்துக் கொள்ளாமல், மகாராணா பிரதாப், சிவாஜி, சந்திரசேகர் ஆஸாத், ராம்பிரசாத் பிஸ்மில், மங்கள் பாண்டே, குரு கோவிந்த் சிங் ஆகியோரை முன்மாதிரியாகக் கொள்ள வேண்டும்.
ஜவாஹர்லால் நேரு பல்கலைக்கழகத்தை மையமாகக் கொண்டுள்ள "விடுதலை முழக்க கும்பல்', நாட்டிற்கான மிகப்பெரிய சவாலாகும். அவர்கள் சில வேளைகளில் காஷ்மீருக்கு சுதந்திரம் கேட்டு போராடுகின்றனர். அந்தக் குழுவுடனோ, மாவோயிஸ்டுகளுடனோ தொடர்புடையவர்கள் நமக்கான முன்மாதிரியாக இருக்க இயலாது என்று அபிஜாத் மிஸ்ரா உரையாற்றினார்.