"ராஜீவ் காந்திக்கு வழங்கப்பட்ட  பாரத ரத்னா விருதை திரும்பப் பெற வேண்டும்'

சீக்கிய படுகொலைகளில் முன்னாள் பிரதமர் ராஜீவ் காந்திக்கு தொடர்புள்ளதாகக் கூறி அவருக்கு வழங்கப்பட்ட பாரத ரத்னா விருதை திரும்பப் பெற வேண்டும் என தில்லி பாஜக செய்தித் தொடர்பாளர் தஜீந்தர் பால் சிங் பாகா தெரிவித்துள்ளார்.
இது தொடர்பாக தில்லியில் செய்தியாளர்களுக்கு வியாழக்கிழமை அவர் அளித்த பேட்டி: சீக்கியர்கள் மீது நடத்தப்பட்ட தாக்குதல்களை காங்கிரஸ் தலைவர்கள் ஜக்தீஷ் டைட்லர், சஜன்குமார், முன்னாள் காங்கிரஸ் அமைச்சர் எச்.கே.எல். பகத், நாடாளுமன்ற உறுப்பினர் தரம்தாஸ் சாஸ்திரி, லலித் மக்கான் ஆகியோரே ஒருங்கிணைத்து நடத்தியதாக விசாரணைக் கமிஷன் தெரிவித்துள்ளது. இவர்கள் ராஜீவ் காந்தியின் ஆதரவுடனேயே சீக்கியர்கள் மீது தாக்குதல்களை நடத்தினார்கள். 
இந்திரா காந்தி கொலையுண்டு, 2 வாரங்களுக்குப் பிறகு, தில்லி போட் கிளப்பில் உரையாற்றிய ராஜீவ் காந்தி, "மக்கள் கோபத்தில் உள்ளனர். மிகப்பெரிய விருட்சம் ஒன்று பெயர்ந்து விழும் பொழுது அந்த நிலம் சற்று அதிரவே செய்யும்' என்று சீக்கியப் படுகொலைகளை நியாயப்படுத்திப் பேசினார்.அவர் தன்னுடைய பதவிக் காலத்தில், சீக்கியப் படுகொலைக்காக மனம் வருந்தவும் இல்லை. மன்னிப்புக் கோரவும் இல்லை. நவீன இந்தியாவில் கும்பல் படுகொலையின் தந்தையான ரஜீவ் காந்திக்கு இந்தியாவின் உயர் விருதான பாரத ரத்னாவை வழங்கியது நியாயமற்றது. அவருக்கு வழங்கப்பட்ட பாரத ரத்னா விருதை உடனடியாகத் திரும்ப பெற வேண்டும் என்றார் அவர்.