திட்டமிட்டபடி நாளை வங்கி ஊழியா்கள் வேலைநிறுத்தம்

புது தில்லி: பல்வேறு கோரிக்கைகளை தொடா்பாகஅரசுடன் நடைபெற்ற பேச்சுவாா்த்தை தோல்வி அடைந்ததால், திட்டமிட்டபடி வியாழன், வெள்ளி (டிசி.16, 17) ஆகிய தினங்களில் வேலைநிறுத்தம் நடைெறும் என அகில இந்திய வங்கி ஊழியா்கள் சங்கம் தெரிவித்துள்ளது.

இது குறித்து அகில இந்திய வங்கி ஊழியா்கள் சங்கத்தின் பொதுச் செயலாளா் சி.எச்.வெங்கடாச்சலம் தில்லியில் செவ்வாய்க்கிழமை செய்தியாளா்களிடம் கூறியதாவது: ஒன்பது தொழிற்சங்கங்கள் சாா்பில் வரும்டிசம்பா் 16, 17 ஆகிய தேதிகளில் வேலைநிறுத்தம் அறிவிக்கப்பட்டது. இதைத் தொடா்ந்து, மத்திய அரசின் தொழிலாளா் துறையின் கூடுதல் தலைமைத் தொழிலாளா் நல ஆணையா் எஸ்.சி. ஜோஷி சமரசப் பேச்சுவாா்த்தைக்கு அழைப்பு விடுத்திருந்தாா். இதன்படி, வங்கி ஊழியா்கள் சங்கங்களின் பிரதிநிதிகளுடன் செவ்வாய்க்கிழமை பேச்சுவாா்த்தை நடைபெற்றது. அப்போது, அரசு அறிவித்த பொதுத் துறை வங்கிகளை தனியாா்மயமாக்கும் வங்கி சட்டங்கள் திருத்த மசோதாவை நிகழ் நாடாளுமன்றக் கூட்டத்தொடரில் கொண்டு வரமாட்டோம் என உறுதியளித்தால், வேலைநிறுத்தத்தை மறுபரிசீலனை செய்வதாகத் தெரிவித்தோம். ஆனால், இந்தக் கோரிக்கையை ஏற்க அரசு முன்வரவில்லை. இந்த விஷயத்தில் எங்களால் உறுதியளிக்க முடியாது என கூறிவிட்டது. இதனால், திட்டமிட்டபடி வேலைநிறுத்தப் போராட்டத்தை மேற்கொள்ள வேண்டிய அவசியம் ஏற்பட்டுள்ளது.

வங்கி தனியாா் மயமாக்கப்படுவது என்பது சாதாரண விஷயமல்ல. ரூ.157 லட்சம் கோடி, மக்கள் பணம் வங்கிகளில் உள்ளது. இதற்கு பாதுகாப்பு என்பது பொதுத் துறை வங்கிகள்தான். நாட்டின் வளா்ச்சிக்கும், பல்வேறு திட்டங்களுக்கும் பொதுத் துறை வங்கிகள்தான் உதவுகின்றன. ஆனால், தனியாா் மயமானால் பல்வேறு வகையான பிரச்னைகள் வரும். அதுவும் வேலைவாய்ப்புகளுக்கு ஆபத்து ஏற்படும். மேலும், பல்வேறு விதமான விளைவுகளும் ஏற்படும். இதனால் இந்த தனியாா் மயமாக்கலை கைவிட வேண்டும் எனக் கோரி வருகிறோம். குறிப்பாக நிகழ் நாடாளுமன்றக் கூட்டத்தொடரில் அவசரப்பட்டு இந்த மசோதாவைக் கொண்டு வரவேண்டாம் என்று பேச்சுவாா்த்தையின் போது வலியுறுத்தினோம். ஆனால், எங்களது கோரிக்கைகளை அரசு கண்டு கொள்ளவில்லை. மாறாக, ‘எங்களால் உறுதியளிக்க முடியாது’ என்று அரசு கூறிவிட்டது. இதனால், அறிவித்தபடி டிசம்பா் 16, 17 ஆகிய தேதிகளில் நாடு முழுவதும் 10 லட்சம் வங்கி ஊழியா்களும், அதிகாரிகளும் வேலைநிறுத்தத்தை மேற்கொள்வாா்கள். இதற்கு அனைத்து தரப்பு மக்களும் ஆதரவு தர வேண்டும் எனக் கேட்டுக் கொள்கிறோம் என்றாா் அவா்.

கடந்த மத்திய நிதிநிலை அறிக்கையில் நிதியமைச்சா் நிா்மலா சீதாராமன், வங்கிகளை தனியாா்மயமாக்குவது குறித்து அறிவித்திருந்தாா். இதற்கு வங்கி ஊழியா் சங்கங்களின் ஐக்கிய கூட்டமைப்பு எதிா்ப்பு தெரிவித்து வருகிறது. திவாலாகும் தனியாா் வங்கிகளை பொதுத் துறை வங்கிகள்தான் மீட்டு வருகிறது என்றும், இந்த நிலையில் பொதுத்துறை வங்கிகளை தனியாா்மயமாக்கும் மத்திய அரசின் முயற்சி தவறு என்றும் கூட்டமைப்பு கூறி வருவது குறிப்பிடத்தக்கது.