திருவண்ணாமலை, திருத்தணிக்கும் ‘பிரசாத’ திட்டம்: மத்திய அரசிடம் தமிழகம் கோரிக்கை

புது தில்லி: ராமேசுவரத்தைப் போன்று திருவண்ணாமலை, திருத்தணி போன்ற திருத்தலங்களையும் பிரசாத திட்டத்தில் சோ்த்து மேம்படுத்த மத்திய கலாசாரம் மற்றும் சுற்றுலாத் துறை அமைச்சா் கிஷண் ரெட்டியிடம் கோரிக்கை வைக்கப்பட்டுள்ளதாக தமிழக சுற்றுலாத் துறை அமைச்சா் மா. மதிவேந்தன் தெரிவித்தாா்.

தில்லி கிரேட்டா் நொய்டாவில் தெற்காசியப் பயண சுற்றுலா பரிமாற்றம் குறித்த நிகழ்ச்சியில் கலந்து கொள்ள வந்த தமிழக சுற்றுலாத் துறை அமைச்சா் மா.மதிவேந்தன், மத்திய கலாசாரம், சுற்றுலாத் துறை அமைச்சா் கிஷண் ரெட்டியை அவரது அலுவலகத்தில் வியாழக்கிழமை சந்தித்தாா். பின்னா், அவா் செய்தியாளா்களிடம் கூறியதாவது: தமிழக அரசு சுற்றுலாத் துறையை மேம்படுத்த பல்வேறு முயற்சிகள் மேற்கொண்டு வருகிறது. ராமேசுவரத்தை சிறந்த சுற்றுலா தலமாக மாற்றுவதற்காக மத்திய அரசின் பிரசாத திட்டத்தின் கீழ் மத்திய சுற்றுலாத் துறை அமைச்சகத்திற்கு கோரிக்கை வைக்கப்பட்டது. இதற்காக ரூ. 49.70 கோடி மதிப்பீடு அனுப்பப்பட்டது. இதை ஏற்று திட்டத்திற்கு மத்திய சுற்றுலாத் துறை அமைச்சா் ஒப்புதல் வழங்கியுள்ளாா். மேலும், மத்திய அரசின் பிரசாத திட்டத்தின் கீழ் திருவண்ணாமலை, திருத்தணி ஆகிய திருத்தலங்களையும் மேம்படுத்துவதற்கு முனைப்பு திட்ட அறிக்கை தயாரிக்கப்பட்டுள்ளதையும் தெரிவித்து இதற்கான கோரிக்கையும் மத்திய அமைச்சரிடம் முன்வைக்கப்பட்டுள்ளது.

ராமேசுவரத்தில் இந்தப் பிரசாத திட்டம் ஐந்து திட்டங்களாகப் பிரிக்கப்பட்டு ஆரம்ப கட்ட பணிகள் தொடங்கியுள்ளன. இதில், அக்னி படி தீா்த்தம் (படித்துறை), வாகன நிறுத்துமிடங்கள், நடைபாதைகள் சீா்படுத்தல், படகு தளம், ஒளிவூட்டுதல் அமைத்தல் ஆகியவையாகும். இரண்டாம் கட்ட சுதேஷ் தரிசனம் திட்டமும் மத்திய அரசால் தொடங்கப்படவுள்ளது. இந்தத் திட்டத்திற்காக தமிழ்நாட்டில் ஒரு சில இடங்கள் தோ்வு செய்து மத்திய அரசுக்கு அனுப்பப்படும். மேலும், ஸ்வதேஷ் தரிசனம் திட்டத்தின் கீழ் கடலோர சுற்று வளா்ச்சித் திட்டங்களுக்கு நிலுவையில் உள்ள நிதியை வழங்க கோரப்பட்டது.

நாட்டிலுள்ள 17 முக்கிய சுற்றுலா சின்னங்களில் மாமல்லபுரத்தையும் மத்திய சுற்றுலாத் துறை தோ்வு செய்துள்ளது. இதை முன்னிட்டு இங்கு சா்வதேச தரத்தில் ரூ. 461.22 கோடியில் பல்வேறு மேம்பாட்டுப் பணிகளுக்கு திட்டமிடப்பட்டுள்ளது. இந்தத் திட்டத்திற்கும் முன்னுரிமை வழங்க மத்திய அமைச்சரிடம் கோரப்பட்டுள்ளது. ஒரு சில சுற்றுலா தலங்களுக்கு 3டி நுட்ப ஒளிவூட்டுதல் பணிகள் மேற்கொள்ளப்படவுள்ளன. இதற்கு மத்திய அரசிடம் அனுமதி பெறுவதற்கான கோரிக்கையும் வைக்கப்பட்டுள்ளது. சுற்றுலாவை மேம்படுத்துவதற்காக சுற்றுலாத் துறையின் சாா்பில், மத்திய தொல்லியல் துறை கட்டுப்பாட்டில் (ஏஎஸ்ஐ) உள்ள இடங்களில் பல்வேறு குறும்படங்களைத் தயாரிக்க முடிவு செய்யப்பட்டது. ஆனால், இதற்கு ஏஎஸ்ஐ கட்டணம் வசூலித்து வந்தது. இந்தக் கட்டணத்தை நீக்குவதற்கும் மத்திய அரசிடம் கோரிக்கை வைத்திருந்தோம். தற்போது இந்தக் கட்டணம் நீக்கப்பட்டுள்ளது.

தமிழ்நாடு சுற்றுலா வளா்ச்சி நிறுவனம் மறைந்த முன்னாள் முதல்வா் கருணாநிதியால் தொடங்கப்பட்டது. 50 ஆண்டுகளைக் கடந்து 51-ஆவது ஆண்டிற்கு அடியெடுத்து வைக்கிறது. தமிழ்நாடு சுற்றுலா வளா்ச்சி நிறுவனத்தில் 50-க்கும் மேற்பட்ட ஹோட்டல்கள் இயங்கி வருகின்றன. இதில் 25 ஹோட்டல்கள் தமிழ்நாடு சுற்றுலா வளா்ச்சி நிறுவனத்தின் கீழும் மீதமுள்ள 25 ஹோட்டல்கள் தனியாருக்கும் குத்தகைக்கு விடப்பட்டுள்ளது. குத்தகை முடிந்த சில ஹோட்டல்களை மறுபடியும் தமிழ்நாடு சுற்றலா வளச்சி நிறுவனமே எடுத்து நடத்தி வருகிறது. தமிழ்நாடு ஹோட்டல் முன்பதிவுகள் இணையதளம் வழியாக பதிவு செய்யப்படவும் இதற்கான செயலிகளும் உருவாக்கப்பட்டுள்ளது என்றாா் அமைச்சா்.