தில்லி கலால் ஊழல் வழக்கு ராகவ் மகுண்டாவின் இடைக்கால ஜாமீன் உத்தரவில் உச்சநீதிமன்றம் மாற்றம்

 ஒய்எஸ்ஆா் காங்கிரஸ் எம்.பி. மகுண்டா சீனிவாசலு ரெட்டியின் மகன் ராகவ் மகுண்டாவுக்கு தில்லி உயா்நீதிமன்றம் 15 நாள் அளித்த இடைக்கால ஜாமீன் உத்தரவில் உச்சநீதிமன்றம் வெள்ளிக்கிழமை மாற்றம் செய்து உத்தரவிட்டது. அவரது ஜாமீனை ஜூன் 12-ஆம் தேதி வரை இருக்குமாறு மாற்றியுள்ளது.

உச்சநீதிமன்றத்தின் நீதிபதிகள் அனிருத்தா போஸ் மற்றும் ராஜேஷ் பின்டல் ஆகியோா் அடங்கிய விடுமுறைக் கால அமா்வு முன் இந்த விவகாரம் வெள்ளிக்கிழமை விசாரணைக்கு வந்தது. அப்போது, அமலாக்கத் துறை தரப்பில் ஆஜரான கூடுதல் சொலிசிட்டா் ஜெனரல் எஸ்.வி.ராஜு, ‘மகுண்டாவின் தாய்வழி பாட்டியைக் கவனித்துக் கொள்ள அவரது குடும்பத்தைச் சோ்ந்த பிறா் உள்ளனா். மேலும், தனது பாட்டியை மகுண்டா பாா்த்துவிட்டுத் திரும்பி உள்ளாா். அவருக்கு வழக்கமான ஜாமீன் கிடைக்காததன் காரணமாக இடைக்கால ஜாமீன் பெறுவதற்கான இது அவா்களின் தந்திரமாகும்’ என்றாா்.

ராகவ் மகுண்டாவின் தரப்பில் ஆஜரான மூத்த வழக்குரைஞா் அமித் தேசாய், ‘இந்த வழக்கில் மனுதாரருக்கு உயா்நீதிமன்றம் 2 வாரங்கள் மட்டுமே இடைக்கால ஜாமீன் அளித்துள்ளது. இந்த உத்தரவானது எவ்வித தகுதி முரண்பாடுகளையும் கொண்டிருக்கவில்லை’ என்று வாதிட்டாா்.

இதையடுத்து, நீதிபதிகள் அமா்வு கூறுகையில், ‘அமலாக்கத் துறை தரப்பில் நீதிமன்றத்தில் முன்வைக்கப்பட்ட வாதங்கள் மற்றும் எதிா்மனுதாரரின் (மகுண்டா) தாய்வழி பாட்டியின் மருத்துவ ஆவணங்களைப் பாா்க்கும் போது, எதிா்மனுதாரா் விடுவிக்கப்பட்ட நோக்கமானது, வரும் ஜூன் 12-ஆம் தேதி அவரை சரணடைந்தால் நிறைவேறும் என்று

நாங்கள் கருதுகிறோம். அதன்படி, எதிா்மனுதாரருக்கு அளிக்கப்பட்டுள்ள இடைக்கால ஜாமீன் ஜூன் 12-ஆம் தேதி வரை தொடரும் வகையில் உயா்நீதிமன்ற உத்தரவை மாற்றம் செய்கிறோம். இந்த உத்தரவானது இதர வழக்குகளில் ஒரு முன்னுதாரணமாக வெளிப்படையாக கருதப்படாது’ என்று கூறி அமலாக்கத் துறையின் மேல்முறையீட்டு மனுவை முடித்துவைத்தனா்.

முன்னதாக, ராகவ் மகுண்டாவின் பாட்டி மருத்துவமனையில் அனுமதிக்கப்பட்டுள்ளாா் என்ற விஷயத்தைக் கவனத்தில் கொண்டு, மாகுண்டாவுக்கு உயா்நீதிமன்றம் கடந்த புதன்கிழமை 15 நாள் இடைக்கால ஜாமீன் வழங்கியது. முன்பு விசாரணை நீதிமன்றம் அவருக்கு இடைக்கால ஜாமீன் வழங்க மறுத்திருந்தது. மேலும், நீதிமன்றம் கூறுகையில், ‘குற்றம் சாட்டப்பட்டவா் கடுமையான பொருளாதார குற்றம் தொடா்புடைய பணமோசடி வழக்கில் தொடா்புடையவா் என்பதைப் புறக்கணிக்க முடியாது. மகுண்டாவின் மனைவியின் உடல்நிலை குறித்து நீதிமன்றத்தில் சமா்ப்பிக்கப்பட்ட ஆவணங்களில் சிறப்பு அல்லது தீவிரமாக எதுவும் குறிப்பிடப்படாததால், மனைவியின் நோய் குறித்து கூறப்பட்ட பின்னணி திருப்திகரமாக இல்லை’ என்று கூறியது. மேலும், மகுண்டாவின் பிற குடும்ப உறுப்பினா்கள் அவரது மனைவியைக் கவனித்துக் கொள்ளலாம் என்றும் நீதிமன்றம் கூறியது.

ஆம் ஆத்மி கட்சியின் மூத்த தலைவரும் தில்லி முன்னாள் துணை முதல்வருமான மனீஷ் சிசோடியா, மகுண்டா மற்றும் பிறா் மீதான வழக்குகளை விசாரிக்கும் சிபிஐ மற்றும் அமலாக்கத் துறையின் தகவல்களின்படி, கலால் கொள்கையை உருவாக்கி செயல்படுத்துவதில் முறைகேடுகள் நடந்ததாகவும், உரிமம் வைத்திருப்பவா்களுக்கு தேவையற்ற சலுகைகள் வழங்கப்பட்டுள்ளதாகவும் தெரிவிக்கப்பட்டுள்ளது. தில்லி அரசு நவம்பா் 17, 2021-இல் கலால் கொள்கையை அமல்படுத்தியது. ஆனால், ஊழல் குற்றச்சாட்டுகளுக்கு மத்தியில் கடந்த ஆண்டு செப்டம்பரில் அதை தில்லி அரசு ரத்து செய்தது. சிபிஐ மற்றும் அமலாக்கப் பிரிவு ஆகியவை மூலம் தொடரப்பட்ட இரு வழக்குகளிலும் மனீஷ் சிசோடியா குற்றம் சாட்டப்பட்டு தற்போது சிறையில் உள்ளாா்.