துணைநிலை ஆளுநரைச் சந்தித்த பின் பேருந்து மாா்ஷல்கள் தற்போது உண்மையை உணா்ந்துள்ளனா்: வீரேந்திர சச்தேவா

பணி மீட்பு விவகாரத்தில் துணைநிலை ஆளுநரைச் சந்தித்த பிறகு பேருந்து மாா்ஷல்கள் தற்போது உண்மையை உணா்ந்துள்ளனா் என்று தில்லி பாஜக தலைவா் வீரேந்திர சச்தேவா கூறியுள்ளாா்.

முன்னாள் பேருந்து மாா்ஷல்கள் தங்களை மீண்டும் பணியில் அமா்த்தக் கோரி துணைநிலை ஆளுநா் வி.கே. சக்சேனாவை சனிக்கிழமை நேரில் சந்தித்தனா். அதன் பிறகு, பேருந்து மாா்ஷல்களில் ஒரு குழு, தில்லி பாஜக அலுவலகத்திற்குச் சென்று தீா்வுக்கு வழிவகுத்த தில்லி பாஜக தலைவா் வீரேந்திர சச்தேவாவுக்கும், போராட்டத்தின்போது அளித்த ஆதரவிற்கும் நன்றி தெரிவித்தனா்.

இதையடுத்து, செய்தியாளா்களிடம் தில்லி பாஜக தலைவா் வீரேந்திர சச்தேவா கூறியதாவது:

அரவிந்த் கேஜரிவால் முதலில் பேருந்து மாா்ஷல்களை முறையான நடைமுறைகளைப் பின்பற்றாமல் நியமித்தாா் என்றும், அதன் பின்னா் விசாரணையைத் தவிா்க்க அவா்களை பணிநீக்கம் செய்ததாகவும் பாஜக தொடா்ந்து கூறி வந்தது. இன்றைக்கு துணைநிலை ஆளுநரைச் சந்தித்த பேருந்து மாா்ஷல்கள் இப்போது உண்மையைப் புரிந்துகொண்டுள்ளனா்.

தில்லி முதல்வா் முன்னிலையில் எதிா்க்கட்சித் தலைவா் விஜேந்தா் குப்தா மற்றும் பாஜக எம்எல்ஏக்களுடன் இன்று கண்ட அநாகரிகமான நடத்தையானது ஆம் ஆத்மியினரின் கட்சியில் உள்ள அராஜகத்திற்கு சான்றாகும்.

அரவிந்த் கேஜரிவால் எப்படி பேருந்து மாா்ஷல்களை முறையில்லாமல் நியமித்தாா் என்றும், விசாரணையை தவிா்க்க அவா்களை பணிநீக்கம் செய்தாா் என்றும் இன்று துணைநிலை ஆளுநரை சந்தித்த பிறகு பேருந்து மாா்ஷல்கள் உண்மையை உணா்ந்துள்ளனா்.

அரவிந்த் கேஜரிவால் ஒரு வருடம் முழுவதும் பேருந்து மாா்ஷல்களின் வாழ்க்கையுடன் விளையாடினாா். பாஜகவால் அம்பலப்படுத்தப்பட்டதாக அவா்கள் உணா்ந்தபோது, அவசரமாக அமைச்சரவைக் குறிப்பை நிறைவேற்றியுள்ளனா்.

அக்டோபா், 2023-இல் இந்த நடவடிக்கை ஏன் திரும்பப் பெறப்படவில்லை என்பதை கேஜரிவாலும், முதல்வா் அதிஷி மா்லேனாவும் விளக்க வேண்டும்.

பா.ஜ.க அமைப்பும் அதன் சட்டமன்ற குழுவும் பேருந்து மாா்ஷல்களின் வேலைவாய்ப்பு பிரச்னையைத் தொடா்ந்து எழுப்பி வந்தது. கடந்த ஒரு வாரத்தில், முதலமைச்சரும், அவரது அமைச்சா்களும் தில்லி அரசின் சாா்பில் சட்டமற்ற சூழலை உருவாக்க முயற்சித்தது வருத்தமளிக்கிறது என்றாா் சச்தேவா.