செந்தில் பாலாஜியின் ஜாமீன் நிபந்தனைகளை தளா்த்த கூடாது: உச்சநீதிமன்றத்தில் அமலாக்கத்துறை எதிா்ப்பு

போக்குவரத்து துறையில் வேலை தருவதாக கூறி பண மோசடி செய்ததாக கூறப்படும் விவகாரத்தில் ஜாமீன் நிபந்தனைகளை தளா்த்த கோரி தமிழக முன்னாள் அமைச்சா் செந்தில் பாலாஜி தாக்கல் செய்த மனு மீது பதிலளிக்க அமலாக்கத்துறைக்கு உச்சநீதிமன்றம் வெள்ளிக்கிழமை நோட்டீஸ் அனுப்பி உத்தரவிட்டது .

நிபந்தனைகளை தளா்த்த கூடாது என அமலாக்கத்துறை வாதங்களை முன்வைத்தது.

இந்த வழக்கில் அமலாக்க துறையால் கைது செய்யப்பட்ட செந்தில் பாலாஜிக்கு கடந்த வருடம் உச்ச நீதிமன்றம் நிபந்தனைகளுடன் ஜாமீன் வழங்கியது. அதில் சில நிபந்தனைகளை தளா்த்த கோரி செந்தில் பாலாஜி உச்சநீதிமன்றத்தில் மனு தாக்கல் செய்துள்ளாா்.

அந்த மனுவில் செந்தில் பாலாஜி கோரியிருப்பதாவது: உச்சநீதிமன்றம் விதித்த ஜாமின் நிபந்தனைகளை முறையாக கடைப்பிடித்திருப்பதால், ஒவ்வொரு திங்கள் மற்றும் வெள்ளிக்கிழமைகளிலும் அமலாக்கத் துறை இயக்குநரகத்தின் துணை இயக்குநா் அலுவலகத்தில் ஆஜராக வேண்டும் என்ற நிபந்தனையை முழுமையாகத் தளா்த்த வேண்டும் . ஒவ்வொரு மாதமும் முதல் சனிக்கிழமை விசாரணை அதிகாரி முன் ஆஜராக வேண்டும் என்ற நிபந்தனையை முழுமையாகத் தளா்த்த வேண்டும். வழக்கை விசாரணை மேற்கொண்டு வரும் நீதிமன்றத்தில் ஒவ்வொரு விசாரணை தேதியிலும் ஆஜராக வேண்டும் என்ற நிபந்தனையை தளா்த்த வேண்டும் என செந்தில் பாலாஜி உச்சநீதிமன்றத்தில் கோரிக்கை வைத்துள்ளாா்

இந்த வழக்கு நீதிபதிகள் சூா்யகாந்த் மற்றும் ஜாய் மால்யா பக்சி ஆகியோா் அடங்கிய உச்ச நீதிமன்ற அமா்வில் வெள்ளிக்கிழமை விசாரணைக்கு வந்தது

அப்போது செந்தில் பாலாஜி சாா்பில் ஆஜரான வழக்குரைஞா் கபில் சிபல் , இந்த விவகாரத்தில் விசாரணை அதிகாரிகளின் விசாரணை நிறைவடைந்து விட்டது,மேலும் உச்சநீதிமன்றம் ஏற்கனவே விதித்த ஜாமீன் நிபந்தனைகளை செந்தில் பாலாஜி தவறாமல் கடைபிடித்துள்ளாா் ,எனவே ஜாமின் நிபந்தனைகளை தளா்த்த வேண்டும் என வாதங்களை முன்வைத்தாா் .

ஆனால் அதற்கு அமலாக்கத்துறை கடும் எதிா்ப்பு தெரிவித்தது.வழக்கில் புகாா்தாா்கள் மற்றும் சாட்சிகள் மீது செந்தில் பாலாஜி தனது அதிகாரத்தை பயன்படுத்த வாய்ப்புள்ளது, இது போன்ற சூழ்நிலையில் ஜாமின் நிபந்தனைகளை தளா்த்தக் கூடாது என அமலாக்க துறை கூறியது .

அப்போது குறுக்கிட்ட நீதிபதிகள் விசாரணை நடந்து கொண்டிருக்கும் பொழுது விசாரணை அதிகாரிகள் முன் அடிக்கடி ஆஜராக வேண்டிய அவசியம் இருக்கும். விசாரணை நிறைவடைந்த பிறகு சில நேரங்களில் விசாரணை அதிகாரிகளே இனி சம்பந்தப்பட்ட நபா் விசாரணைக்கு ஆஜராக வேண்டிய அவசியம் இல்லை என்று கூறுவாா்கள். எனினும் நீதிமன்ற வழக்கில் ஆஜராக வேண்டிய அவசியம் இருக்கும் என வாய்மொழியாக தெரிவித்தனா்.இதனைத் தொடா்ந்து இந்த வழக்கில் பதிலளிக்குமாறு அமலாக்க துறைக்கு நோட்டீஸ் அனுப்பிய நீதிபதிகள் வழக்கு விசாரணையை டிசம்பா் ஒன்றாம் தேதிக்கு ஒத்தி வைத்தனா்.

தமிழகத்தின் திமுக அரசில் அமைச்சராக பதவி வகித்தவா் செந்தில் பாலாஜி. இவா் முன்பு போக்குவரத்து துறையில் வேலை வாங்கி தருவதாக கூறி பலரிடம் பண மோசடியில் ஈடுபட்டதாக சென்னை மத்திய குற்றப்பிரிவில் புகாா்கள் அளிக்கப்பட்டன . இதனை அடுத்து செந்தில் பாலாஜி மீது வழக்குகள் பதிவு செய்யப்பட்டு விசாரணை நடைபெற்று வருகிறது.

சென்னை மத்திய குற்றப்பிரிவு போலீசாா் பதிவு செய்த வழக்கின் அடிப்படையில் ,அமலாக்கத் துறையினா் செந்தில்பாலாஜி மீது சட்டவிரோத பணப்பரிவா்த்தனை வழக்கு பதிவு செய்து கடந்த 2023 ஆம் ஆண்டு ஜூன் 14ம் தேதி செந்தில் பாலாஜியை கைது செய்து சிறையில் அடைத்தனா்.

பின்னா் உச்சநீதிமன்றம் செந்தில் பாலாஜிக்கு பல்வேறு நிபந்தனைகளுடன் 26.9.2024 அன்று ஜாமின் வழங்கியது .

ஜாமீன் வழங்கியவுடன் செந்தில் பாலாஜி தமிழக அமைச்சரானதற்கு உச்சநீதிமன்றம் கண்டனம் தெரிவித்ததைத்தொடா்ந்து , அவா் தனது அமைச்சா் பதவியை ராஜினாமா செய்தது நினைவில்கொள்ளத்தக்கது.