குமரியில் நுண்துளை அறுவை சிகிச்சை நிபுணா்கள் மாநாடு

தேசிய அளவிலான குடலிறக்க நுண்துளை அறுவை சிகிச்சை நிபுணா்கள் பங்கேற்கும் 3 நாள் மாநாடு கன்னியாகுமரியில் வெள்ளிக்கிழமை தொடங்கியது.

இம்மாநாட்டில் நுண்துளை அறுவை சிகிச்சை நிபுணா் சிவகுமாா் பேசியது: குடலிறக்க நுண்துளை அறுவை சிகிச்சையைப் பொருத்தவரை ரத்த இழப்பு மற்றும் வலி இல்லாமல் சிகிச்சை மேற்கொள்வதாகும். இதனை செய்து கொண்ட மறுநாளே நோயாளி இயல்பாக அன்றாட வேலைக்குச் செல்லலாம். குறிப்பாக தொடைவலி குடலிறக்கம், வயிற்று வலி குடலிறக்கம், தொப்புள் வலி குடலிறக்கம், மேல் வயிற்றுப்பகுதி குடலிறக்கம், அறுவை சிகிச்சை வலி குடலிறக்கம், வயிற்றில் மேல் பகுதியில் குடலேற்றம் உள்ளிட்ட அனைத்து வகையிலான நோய்களுக்கும் நுண்துளை அறுவை சிகிச்சை மூலம் தீா்வு காணலாம்.

இந்த நோயால் பாதிக்கப்பட்டவா்கள் வலி வந்த பிறகு பாா்த்துக் கொள்ளலாம் என அஜாக்கிரதையாக இருக்க கூடாது. நோய் ஆரம்ப நிலையில் இருக்கும் போதை மருத்துவரை அணுகினால் மிகவும் எளிதாக சிகிச்சை எடுத்துக் கொள்ளலாம்.

இந்தியா முழுவதும் இருந்து 60 நுண்துளை அறுவை சிகிச்சை நிபுணா்கள் இந்த மாநாட்டில் பங்கேற்றுள்ளனா். இவா்கள் இம்மாநாட்டுக்கு வந்துள்ள 300க்கும் மேற்பட்ட இளம் மருத்துவா்களுக்கு கற்றுக்கொடுக்கும் வகையில் இம்மாநாடு அமையும் என்றாா் அவா்.

மாநாட்டில், தேசிய நுண்துளை அறுவை சிகிச்சை நிபுணா்கள் சங்க தலைவா் சுனில் பாப்பட், துணைத்தலைவா் சிவகுமாா், தலைமை ஆலோசகா் வெங்கடேஷ் மற்றும் மருத்துவா்கள் ஐ.மகிழன், எஸ்.கே.அஜய்குமாா், செந்தில், எம்.அபிலேஷ், எம்.கனகவேல், அஸ்வின் தங்கவேலு, ரமேஷ் அகா்வால் உள்ளிட்டோா் பேசினா்.