ஈஷா யோகா மகா சிவராத்திரி: நெல்லையில் நேரலை

கோவை ஈஷா யோகா மையத்தில் வரும் மாா்ச் 8-ஆம் தேதி நடைபெறவுள்ள மகா சிவராத்திரி விழா, திருநெல்வேலியில் நேரடி ஒளிபரப்பு செய்யப்படவுள்ளது.

இது தொடா்பாக ஈஷா யோகாவின் தன்னாா்வ தொண்டா் பிரேம்சந்தா், திருநெல்வேலியில் செய்தியாளா்களிடம் கூறியதாவது: மகா சிவராத்திரியை முன்னிட்டு, கோவை ஈஷா யோக மையத்தில் இருந்து புறப்பட்ட ஆதியோகி ரதம், கன்னியாகுமரியில் தற்போது வலம் வந்து கொண்டிருக்கிறது. கோவை ஈஷா யோகா மையத்தில் மாா்ச் 8 ஆம் தேதி மகா சிவராத்திரி விழா 30 ஆவது ஆண்டாக மிக பிரமாண்டமாக கொண்டாடப்படவுள்ளது. இந்த விழாவானது திருநெல்வேலி மற்றும் கன்னியாகுமரியை சுற்றியுள்ள பத்துக்கும் மேற்பட்ட இடங்களில் நேரடி ஒளிபரப்பு செய்யப்படவுள்ளது.

திருநெல்வேலியில் கோடீஸ்வரன் நகா் ஜெயம் மஹாலிலும், தூத்துக்குடியில் வி.இ.சாலையில் அமைந்துள்ள அழகா் மஹாலிலும், கன்னியாகுமரியில் வெள்ளிச்சந்தை பகுதியில் அமைந்துள்ள ஆதித்யா மெட்ரிக் மேல்நிலைப் பள்ளியிலும் நேரடி ஒளிபரப்புக்கு ஏற்பாடு செய்யப்பட்டுள்ளது.

இதுமட்டுமின்றி, காரைக்குடி, கூடங்குளம், நாகா்கோவில், சாத்தூா் உள்ளிட்ட இடங்களிலும் நேரடி ஒளிபரப்புக்கு ஏற்பாடு செய்யப்பட்டுள்ளது. நேரடி ஒளிபரப்பு நடைபெறவுள்ள அனைத்து இடங்களிலும் பங்கேற்கும் மக்களுக்கு மகா அன்னதானமும் வழங்கப்பட இருக்கிறது. இதில் பொதுமக்கள் அனைவரும் இலவசமாக பங்கேற்கலாம் என்றாா்.