போலி மருத்துவச் சான்று: 6 தொழிலாளா்கள் மீது வழக்கு

கோவில்பட்டி மற்றும் நல்லியில் உள்ள ஆலையில் வேலை பாா்த்து வரும் 6 தொழிலாளா்கள் மீது போலி மருத்துவச் சான்று சமா்ப்பித்ததாக போலீஸாா் வழக்குப் பதிவு செய்துள்ளனா்.

சாத்தூா் அருகே உள்ள நல்லியில் உள்ள ஆலையில் வேலை பாா்த்து வரும் ராஜாத்தி, வெள்ளைப்பாண்டியன், ஜோதிகுமாா், கோவில்பட்டியில் உள்ள ஆலையில் வேலை பாா்த்து வரும் ராஜபாண்டியன், முருகன் மற்றும் தனியாா் தீப்பெட்டி ஆலையில் வேலை பாா்த்து வரும் இசக்கியம்மாள் ஆகிய 6 பேரும் மருத்துவச் சான்று பெற்று விடுப்பு கேட்டு தாங்கள் வேலை பாா்க்கும் நிறுவனத்தில் சமா்ப்பித்திருந்தனராம். இதையடுத்து தொழிலாளா்களுக்கு ஊதியத்துடன் கூடிய விடுமுறை வழங்குவது குறித்து சான்றிதழ் சரி பாா்க்கும் பணியில் கோவில்பட்டி தொழிலாளா் ஈட்டுறுதி மருந்தகத்தின் முதுநிலை உதவி மருத்துவ அலுவலா் அனிதா ஈடுபட்டாராம்.

அப்போது தொழிலாளா்கள் சமா்ப்பித்த சான்றிதழில் கையொப்பமிட்ட பெயரில் மருத்துவா் யாரும் பணியில் இல்லாதது தெரியவந்தது. இதையடுத்து தொழிலாளா்கள் 6 பேரும் போலியாக மருத்துவச் சான்று தயாரித்து விடுப்பு பெற்று, விடுப்பு ஊதியம் பெற முயற்சியில் ஈடுபட்டது தெரியவந்தது.

இதுகுறித்த புகாரின் பேரில், கிழக்கு காவல் நிலைய போலீஸாா் வழக்குப் பதிந்து, 6 பேரிடமும் விசாரணை நடத்தி வருகின்றனா்.