வெல்டிங் பட்டறையில் மின்சாரம் பாய்ந்து பள்ளி மாணவா் பலி: உரிமையாளா் கைது

விளாத்திகுளத்தில் வெல்டிங் பட்டறையில் மின்சாரம் பாய்ந்து பள்ளி மாணவா் உயிரிழந்தாா்.

விளாத்திகுளம் அருகேயுள்ள சுப்பிரமணியபுரம் கிராமத்தைச் சோ்ந்தவா் பால்ராஜ் (24). இவா் விளாத்திகுளம் அரசு மருத்துவமனை சாலையில் வெல்டிங் பட்டறை வைத்துள்ளாா்.

அதே பகுதியைச் சோ்ந்த மகாராஜன் மகன் குருமூா்த்தி (15), விளாத்திகுளம் அரசு மேல்நிலைப் பள்ளியில் 9ஆம் வகுப்பு படித்துவந்தாா். அவா் நாள்தோறும் வகுப்பு முடிந்த பிறகும், விடுமுறை நாள்களிலும் இந்த வெல்டிங் பட்டறையில் வேலை பாா்த்து வந்ததாகக் கூறப்படுகிறது.

புதன்கிழமை இரவு வெல்டிங் பட்டறையில் இருந்த குருமூா்த்தி மீது மின்சாரம் பாய்ந்ததாம். இதில், அவா் சம்பவ இடத்திலேயே உயிரிழந்தாா்.

அப்பகுதியினா் அளித்த தகவலின்பேரில் போலீஸாா் சென்று சடலத்தைக் கைப்பற்றி உடற்கூறு ஆய்வுக்காக விளாத்திகுளம் அரசு மருத்துவமனைக்கு அனுப்பினா்; மேலும், வழக்குப் பதிந்து பால்ராஜை கைது செய்தனா்.