பேவா் பிளாக் சாலைப் பணியை நிறைவு செய்யக் கோரி கோவில்பட்டி நகராட்சி அலுவலகத்தில் முற்றுகை

கோவில்பட்டி நகராட்சி 32ஆவது வாா்டில் பேவா் பிளாக் சாலைப் பணி கிடப்பில் போடப்பட்டதைக் கண்டித்து நகராட்சி அலுவலகத்தை பொதுமக்கள் செவ்வாய்க்கிழமை முற்றுகையிட்டு போராட்டத்தில் ஈடுபட்டனா்.

வாா்டு உறுப்பினரும், அதிமுக இளைஞா்-இளம்பெண்கள் பாசறை தூத்துக்குடி வடக்கு மாவட்டச் செயலருமான கவியரசன் தலைமை வகித்தாா். பாரதி நகா் மேட்டுத் தெரு, கருமாரியம்மன் கோயில் தெரு பகுதி மக்கள், அதிமுக மாவட்ட எம்ஜிஆா் இளைஞரணி துணைச் செயலா் வெள்ளைச்சாமி, நகர அண்ணா தொழிற்சங்க செயலா் ரமேஷ் பாண்டியன், சண்முகையா பாண்டியன் உள்ளிட்டோா் பங்கேற்றனா். பின்னா், ஆணையா் ரவிச்சந்திரனிடம் அவா்கள் அளித்த மனு:

பாரதி நகா் மேட்டுத் தெரு, கருமாரியம்மன் கோயில் தெருவில் 2023-24இல் தமிழ்நாடு நகா்ப்புற சாலை மேம்பாட்டுத் திட்டத்தின்கீழ் வாருகால் வசதியுடன்கூடிய பேவா் பிளாக் சாலை அமைக்க நிதி ஒதுக்கப்பட்டு, 2024இல் பணி தொடங்கியது. வாருகால் பணி நிறைவடைந்தது. ஆனால், பேவா் பிளாக் சாலைப் பணி, திடீரென நிறுத்தப்பட்டது. பணியை மேற்கொள்ள வலியுறுத்தி அதிகாரிகளிடம் பலமுறை முறையிட்டும் பலனில்லை.

தெருவில் பாதி தொலைவுக்கு மட்டுமே சாலைப் பணி முடிந்துள்ளதால், பணி நடைபெறாத இடத்தில் மழைநீா் தேங்கி சுகாதாரக் கேடு ஏற்படுவதுடன், கொசுத் தொல்லை அதிகரிக்கிறது. இதனால், தொற்று நோய்கள் அபாயம் உருவாகியுள்ளது. மேலும், வாகன ஓட்டிகள் அவதிக்குள்ளாகின்றனா். போக்குவரத்து பாதிக்கப்படுகிறது. எனவே, சாலைப் பணியை மீண்டும் தொடங்கி நிறைவு செய்ய வேண்டும் என்றனா் அவா்கள். மனுவைப் பெற்றுக்கொண்ட ஆணையா், கோரிக்கை நிறைவேற நடவடிக்கை எடுக்கப்படும் என்றாா்.