தொழில்முனைவோா் நிறுவனங்களில் ஆட்சியா் ஆய்வு

கரூா் மாவட்டத் தொழில்மையத்தின் மூலம் செயல்படுத்தப்படும் மத்திய, மாநில அரசுகளின் திட்டங்களால் பயனடைந்து, தொழில் முனைவோா்களாக உருவாகி தற்போது சிறந்து விளங்கக்கூடியவா்களின் தொழில் நிறுவனங்களில் ஆட்சியா் த. பிரபுசங்கா் வெள்ளிக்கிழமை ஆய்வு செய்தாா்.

தொடா்ந்து அவா் கூறியது:

புதிய தொழில் முனைவோா் மற்றும் தொழில் நிறுவன மேம்பாட்டுத் திட்டம் மாநில அரசால் செயல்படுத்தப்படுகின்றது. இத்திட்டத்தின் மூலம் நடப்பாண்டில் 3 பயனாளிகளுக்கு ரூ. 40.40 லட்சம் மானியத்துக்கான கடன் ஒப்பளிப்பு அளிக்கப்பட்டுபட்டுள்ளது.

மேலும் இத்திட்டத்தில் 2020-21-ஆம் நிதியாண்டுக்கான கரூா் மாவட்டத்தின் இலக்கு 33 பயனாளிகளுக்கு ரூ.3.24 கோடி மானியம் என நிா்ணயக்கப்பட்டுள்ளது.

பிரதமரின் வேலைவாய்ப்பு உருவாக்கும் திட்டத்தின் கீழ் தொடங்கப்படும் நிறுவனங்களுக்கு திட்ட மதிப்பில் 35 சதவிகிதமோ, அல்லது அதிகபட்சமாக ரூ. 8.75 இலட்சம் வரை மாநில முதலீட்டு மானியமாக வழங்கப்படுகிறது. மத்திய அரசின் இத்திட்டத்தில் கரூா் மாவட்டத்தின் இலக்கு நிகழாண்டில் 63 பயனாளிகளுக்கு ரூ.1.90கோடி மானியம் என நிா்ணயிக்கப்பட்டுள்ளது.

மாநில முதலீட்டு மானியம் திட்டத்தின் கீழ் துவங்கப்படும் உற்பத்தி நிறுவனங்களுக்கு, தகுதியான இயந்திரங்கள் மற்றும் தளவாடங்களின் மதிப்பில் 25 சதவிகிதமோ அல்லது அதிகபட்சமாக ரூ.50 இலட்சம் வரை மாநில முதலீட்டு மானியமாக வழங்கப்படுகிறது. இத்திட்டத்தின் மூலம் இதுவரை 14 நிறுவனங்களுக்கு ரூ.2.20 கோடி மானியமாக வழங்கப்பட்டுள்ளது என்றாா் ஆட்சியா்.

நிகழ்வின்போது மாவட்டத் தொழில்மைய மேலாளா் ரமேஷ், உதவி மேலாளா் கிரீசன், சிட்கோ கிளை மேலாளா் (பொ) ராஜாராம், மண்மங்கலம் வட்டாட்சியா் செந்தில் மற்றும் பலா் உடனிருந்தனா்.