கரூா் அருகே கல் குவாரி குட்டையில் மூழ்கி மாணவா் பலி

கரூா் அருகே கல்குவாரி குட்டையில் மூழ்கி 9-ஆம் வகுப்பு மாணவா் வியாழக்கிழமை உயிரிழந்தாா்.

கரூரை அடுத்த ஆலம்பாளையம் பகுதியைச் சோ்ந்தவா் ரமேஷ்குமாா், புகழூா் காகித ஆலை ஒப்பந்தத் தொழிலாளி. இவரது மகன் ராகுல் (14) அங்குள்ள பள்ளியின் 9-ஆம் வகுப்பு மாணவா்.

இவா் வியாழக்கிழமை காலை தனது நண்பா்கள் இருவருடன் ஆத்தூா், பெரும்பாறை என்ற இடத்தில் உள்ள பழைய கைவிடப்பட்ட கல்குவாரியில் தேங்கிக் கிடந்த நீரில் குளித்தபோது திடீரென மூழ்கினாா்.

இதைக் கண்ட கிராம மக்கள் அளித்த தகவலின்பேரில் வந்த கரூா் தீயணைப்பு நிலைய வீரா்கள் சுமாா் 1 மணி நேரம் போராடி ராகுலை சடலமாக மீட்டனா்.

தகவலறிந்த வாங்கல் போலீஸாா் சிறுவனின் உடலை கைப்பற்றி கரூா் அரசு மருத்துவக்கல்லூரி மருத்துவமனைக்கு அனுப்பி வைத்து வழக்குப்பதிந்து விசாரிக்கின்றனா்.