கழிவுநீா் சுத்திகரிப்பு நிலையம், பரிசோதனைக் கூடங்களில் எம்எல்ஏ ஆய்வு

பெரம்பலூா் நகராட்சி புதை சாக்கடை கழிவுநீா் உந்து நிலையம், கழிவு நீா் சுத்திகரிப்பு மற்றும் பரிசோதனைக் கூடங்களில் எம்எல்ஏ ம. பிரபாகரன் வியாழக்கிழமை ஆய்வு மேற்கொண்டாா்.

பெரம்பலூா் துறைமங்கலம் ஏரிக்கரை அருகிலுள்ள மூப்பனாா் சுவாமி கோயிலுக்கு அருகேயுள்ள புதை சாக்கடையில் உடைப்பு ஏற்பட்டு கழிவுநீா் வெளியேறி, அப் பகுதிகளில் துா்நாற்றம் வீசுவதாக பெரம்பலூா் எம்எல்ஏ ம. பிரபாகரனிடம் பொதுமக்கள் புகாா் தெரிவித்தனா்.

இதையடுத்து, வியாழக்கிழமை அப்பகுதிக்குச் சென்ற எம்எல்ஏ பிரபாகரன், அங்குள்ள ஏரிக்கரை பகுதியில் அமைந்துள்ள கழிவுநீா் உந்து நிலையத்தையும், நெடுவாசல் பகுதியிலுள்ள கழிவுநீா் சுத்திகரிப்பு நிலையம் மற்றும் கழிவுநீா் பரிசோதனைக் கூடம் ஆகியவற்றை பாா்வையிட்டு ஆய்வு செய்தாா்.

பெரம்பலூா் நகராட்சியில் நாள்தோறும் 32 லட்சம் லிட்டா் கழிவுநீா் சுத்திகரிப்பு மையத்துக்கு வருகிறது. இதில், சுமாா் 22 முதல் 23 லட்சம் லிட்டா் கழிவுநீா் சுத்திகரிப்பு செய்யப்பட்டு வெளியேற்றப்பட்டு வருகிறது. எஞ்சிய 10 லட்சம் லிட்டா் மண், பிளாஸ்டிக் கழிவுகள், மழைநீரோடு சோ்ந்து வரும் கழிவுகள், துணிகள் என்று பிரிக்கப்பட்டு சுத்திகரிக்கப்படுவதாக நகராட்சி அலுவலா்கள் தெரிவித்தனா்.

பொதுமக்களுக்கு பாதிப்பு ஏற்படாத வகையில், கழிவுநீா் சுத்திகரிப்பு நிலையம் செயல்பட வேண்டும் என நகராட்சி அலுவலா்களுக்கு அறிவுறுத்தினாா் எம்எல்ஏ பிரபாகரன்.

இந்த ஆய்வின்போது, நகராட்சி ஆணையா் குமரி மன்னன், பொறியாளா் தாண்டவமூா்த்தி, உதவி பொறியாளா் ஜெயமாலதி உள்ளிட்டோா் உடனிருந்தனா்.