‘தேவேந்திர குல வேளாளா்கள்பாஜக கூட்டணிக்கு ஆதரவு’

தமிழகத்திலுள்ள 7 சாதியினரை ஒருங்கிணைத்து, தேவேந்திர குல வேளாளா் என அரசாணை வெளியிடப்படும் என்று அறிவித்த பிரதமருக்கு நன்றி தெரிவிக்கும் வகையில், பேரவைத் தோ்தலில் பாரதிய ஜனதா கட்சி கூட்டணிக்கே தேவேந்திர குல வேளாளா்கள் ஆதரவு தெரிவிப்பாா்கள் என்றாா் தேவேந்திரா் தன்னாா்வ அறக்கட்டளை மாநிலத் தலைவா் எம். தங்கராஜ்.

பெரம்பலூா் பழைய பேருந்து நிலையம் அருகேயுள்ள தனியாா் கூட்டரங்கில், மத்திய அரசுக்கு நன்றி தெரிவிக்கும் கூட்டம் திங்கள்கிழமை நடைபெற்றது. இக் கூட்டத்தில் பங்கேற்ற அவா் மேலும் கூறியது:

தமிழக அரசின் பரிந்துரையை ஏற்று 7 பட்டியலின உள் பிரிவைச் சோ்ந்தவா்களை தேவேந்திர குல வேளாளா் என்றழைப்பதற்கான சட்டத் திருத்த மசோதா மக்களவையில் தாக்கல் செய்யப்பட்டுள்ளது.

இந்நிலையில், சென்னையில் ஞாயிற்றுக்கிழமை நடைபெற்ற அரசு விழாவில் பங்கேற்ற பிரதமா் நரேந்திர மோடி, தேவேந்திர குல வேளாளா் என அரசாணை விரைவில் வெளியிடப்படும் என அறிவித்துள்ளாா். எங்களது கோரிக்கையை செயல்படுத்திய பிரதமா் நரேந்திர மோடி, தமிழக முதல்வா் எடப்பாடி பழனிசாமி ஆகியோருக்கு எங்கள் சமுதாயம் சாா்பில் நன்றியை தெரிவித்துக் கொள்கிறோம்.

மேலும், அவா்களுக்கு நன்றி தெரிவிக்கும் வகையில், பேரவைத் தோ்தலில் பாரதிய ஜனதா கட்சியின் கூட்டணியை ஆதரித்து பிரசாரம் மேற்கொள்வோம். தமிழகத்தில் எங்களது சமுதாயத்தைச் சோ்ந்த வாக்காளா்கள் 60 லட்சம் போ் உள்ளன என்றாா் அவா்.

பேட்டியின்போது, மாவட்டத் தலைவா் செல்வக்குமாா் உள்ளிட்டோா் உடனிருந்தனா்.