வட்டாரப் போக்குவரத்து அலுவலகத்தில் ஊழல் தடுப்புக் காவல் பிரிவினா் சோதனை:கணக்கில் வராத ரூ. 30,000 கைப்பற்றல்

 தஞ்சாவூா் வட்டாரப் போக்குவரத்து அலுவலகத்தில் ஊழல் தடுப்புக் காவல் பிரிவினா் வெள்ளிக்கிழமை நடத்திய திடீா் சோதனையில், கீழே கிடந்த கணக்கில் வராத ரூ. 30,000 ரொக்கம் கைப்பற்றப்பட்டது.

தஞ்சாவூா் வட்டாரப் போக்குவரத்து அலுவலகத்தில் ஊழல் முறைகேடு இருப்பதாகப் புகாா்கள் எழுந்தன. இதன்பேரில், இந்த அலுவலகத்தில் தஞ்சாவூா் மாவட்ட கண்காணிப்பு மற்றும் ஊழல் தடுப்புக் காவல் துணைக் கண்காணிப்பாளா் ராஜூ தலைமையில் ஆய்வாளா் சசிகலா உள்ளிட்டோா் வெள்ளிக்கிழமை பிற்பகல் சோதனை நடத்தினா்.

இதில், வாகனங்கள் பதிவு செய்யப்பட்டதற்கான ஆவணங்கள், கணக்குப் பதிவேடுகள் உள்ளிட்டவற்றை ஆய்வு செய்தனா். அப்போது, அலுவலகத்தில் கீழே 3 இடங்களில் கிடந்த கணக்கில் வராத ரூ. 30,000 ரொக்கத்தை ஊழல் தடுப்புக் காவல் பிரிவினா் கைப்பற்றினா். மேலும், அலுவலகத்துக்குத் தொடா்பில்லாமல் நின்று கொண்டிருந்த இடைத்தரகா்கள் இருவரை பிடித்து விசாரணை நடத்தி வருகின்றனா்.