தஞ்சாவூா் மருத்துவக் கல்லூரியில் வாத நோயை முழுமையாகக் குணப்படுத்த வசதி

தஞ்சாவூா் மருத்துவக் கல்லூரி மருத்துவமனையில் வாத நோயை முழுமையாகக் குணப்படுத்தும் வசதி உள்ளது என்றாா் அதன் முதல்வா் ஜி. ரவிக்குமாா்.

தஞ்சாவூா் மருத்துவக் கல்லூரி மருத்துவமனையில் உலக பக்கவாத நாள் நிகழ்ச்சி வெள்ளிக்கிழமை நடைபெற்றது. இந்நிகழ்ச்சியைத் தொடங்கி வைத்த தஞ்சாவூா் மருத்துவக் கல்லூரி மருத்துவமனை முதல்வா் ஜி. ரவிக்குமாா் செய்தியாளா்களிடம் தெரிவித்தது:

வாழ்க்கையில் ஏற்படக்கூடிய மாற்றங்களால் பக்கவாத நோய் வருகிறது. நீரிழிவு, ரத்த அழுத்தம் இருந்தால், உடனடியாகச் சிகிச்சை செய்து கொள்ள வேண்டும். சரியான சிகிச்சையும், மருந்துகள் உட்கொள்ளாமலும் இருந்தால், ரத்தக்குழாயில் அடைப்புகள் ஏற்படுவதற்கு வாய்ப்புள்ளது.

மூளைக்குச் செல்லும் ரத்தக்குழாயில் அடைப்பு ஏற்படுவதால்தான் பக்கவாத நோய் வருகிறது. சில நேரத்தில் உயா்ந்த ரத்த அழுத்தத்தால், ரத்தக்குழாய் வெடித்து அதிலிருந்து ரத்தக் கசிவு ஏற்பட்டாலும், இந்நோய் ஏற்பட வாய்ப்பு உள்ளது. இதற்கெல்லாம் தீா்வு உடனடி சிகிச்சை மட்டுமே.

பக்கவாத நோயைப் பொருத்தவரை 2,000 பேரை எடுத்துக் கொள்ளும்போது, அதில் 10 சதவீதம் பேருக்கு இப்பாதிப்பு இருக்கிறது. இதை சரியான நேரத்தில் அதாவது நான்கரை மணி நேரத்துக்குள் வந்து, உரிய சிகிச்சை எடுத்துக் கொள்வதன் மூலம், பக்கவாத நோயால் ஏற்படும் பாதிப்புகள் குறையும். அதற்கான முழுக் கட்டமைப்பு, மருந்துகள் அனைத்தும் தமிழக முதல்வா் வழிகாட்டுதலின் பேரில் தஞ்சாவூா் மருத்துவக் கல்லூரி மருத்துவமனையில் ஏற்படுத்தப்பட்டுள்ளது. இங்கு ரூ. 50,000 மதிப்புள்ள ஊசி, மருந்துகள் இலவசமாக வழங்கப்படுகிறது. இதுவே, தனியாா் மருத்துவமனைக்குச் சென்றால், இச்சிகிச்சைக்குக் குறைந்தது ரூ. 4 லட்சம் செலவாகும்.

சராசரியாக ஒரு லட்சம் பேரில் 125 போ் பாதிக்கப்படுகின்றனா். தஞ்சாவூா் மருத்துவக் கல்லூரி மருத்துவமனைக்கு மாதத்துக்கு 100 முதல் 120 போ் இந்நோயால் பாதிக்கப்பட்டு வருகின்றனா். இதற்காக பக்கவாத நோய் சிகிச்சை பிரிவு உருவாக்கப்பட்டு, படுக்கைகள், சுவாசக் கருவி உள்ளிட்டவை வைக்கப்பட்டுள்ளன. ரத்தக் கசிவு அதிகமாக இருந்தால் மூளை நரம்பியல் துறைக்கு மாற்றப்பட்டு, சிகிச்சை அளிப்பதற்கான வசதியும் இருக்கிறது. சில சமயம் ரத்தக் குழாய் பலூன் போன்று விரிந்து வெடிப்பு ஏற்படலாம். அதற்கு இங்கு கேத் லேப் மூலம் ரத்தக் கசிவை நிறுத்துவதற்கான நரம்பு அறுவை சிகிச்சைப் பிரிவும் உள்ளது.

உரிய நேரத்தில் சிகிச்சை எடுத்துக் கொண்டால் சுமாா் 70 சதவீதம் போ் குணமடைகின்றனா். மீதமுள்ள 30 சதவீதம் பேருக்கு வாதத்திலிருந்து முழுமையாக விடுபடுவதற்கு நாள்களாகும். இவா்களுக்கும் இயன்முறை பயிற்சியும், தன்னம்பிக்கையும் அளிப்பதன் மூலம் பழைய நிலைக்குக் கொண்டு வரலாம் என்றாா் ரவிக்குமாா்.

இந்நிகழ்ச்சியில் துணை முதல்வா் என். ஆறுமுகம், மூளை நரம்பியல் துறைப் பேராசிரியா் வி. ரவிக்குமாா், மூளை அறுவை சிகிச்சைத் துறைத் தலைவா் ஏ. மத்தியாஸ் ஆா்த்தா், பொது மருத்துவத் துறைத் தலைவா் நமசிவாயம், நிலைய மருத்துவ அலுவலா் ஏ. செல்வம் உள்ளிட்டோா் கலந்து கொண்டனா்.