செப். 15, 17 இல் மாணவா்களுக்கான பேச்சுப் போட்டிகள்

பேரறிஞா் அண்ணா மற்றும் தந்தை பெரியாா் பிறந்த நாளையொட்டி, தஞ்சாவூரில் தமிழ் வளா்ச்சித் துறை மூலம் பள்ளி, கல்லூரி மாணவா்களுக்கான பேச்சுப் போட்டிகள் செப். 15, 17-களில் நடைபெறவுள்ளன.

இதுகுறித்து மாவட்ட ஆட்சியா் தினேஷ் பொன்ராஜ் ஆலிவா் தெரிவித்தது:

தஞ்சாவூா் அரசா் மேல்நிலைப் பள்ளியில் நடைபெறும் போட்டியில் வெற்றி பெறும் பள்ளி மாணவா்களுக்கு மாவட்ட அளவில் முதல் பரிசு ரூ. 5,000, இரண்டாம் பரிசு ரூ. 3,000, மூன்றாம் பரிசு ரூ. 2,000 வழங்கப்படவுள்ளது. தவிர, அரசுப் பள்ளி மாணவா்கள் இருவரைத் தனியாகத் தெரிவு செய்து சிறப்புப் பரிசு ரூ. 2,000 வீதம் வழங்கப்படவுள்ளது.

இதேபோல, கல்லூரி மாணவா்களுக்கும் பரிசு வழங்கப்படும்.

பள்ளி மாணவா்களுக்கான போட்டி காலை 9.30 மணிக்கும், கல்லூரி மாணவா்களுக்கான போட்டி பிற்பகல் 1.30 மணிக்கும் தொடங்கும்.

தஞ்சாவூா் மாவட்ட கல்லூரி மாணவ, மாணவிகள் கல்லூரி முதல்வரிடமும், பள்ளி மாணவ, மாணவிகள் தலைமையாசிரியரிடமும் அனுமதி பெற்று, போட்டியில் பங்கேற்கலாம்.

அண்ணா பேச்சுப் போட்டியைப் பொருத்தவரை பள்ளி மாணவா்களுக்கு தாய் மண்ணிற்குப் பெயா் சூட்டிய தனயன், மாணவா்க்கு அண்ணா, அண்ணாவின் மேடைத்தமிழ், அண்ணா வழியில் அயராது உழைப்போம் ஆகிய தலைப்புகளிலும், கல்லூரி மாணவா்களுக்கு பேரறிஞா் அண்ணாவும் தமிழக மறுமலா்ச்சியும், பேரறிஞா் அண்ணாவின் சமுதாயச் சிந்தனைகள், அண்ணாவின் தமிழ்வளம், அண்ணாவின் அடிச்சுவட்டில், தம்பி! மக்களிடம் செல் ஆகிய தலைப்புகளிலும் போட்டி நடைபெறும்.

தந்தை பெரியாா் பேச்சுப் போட்டியானது பள்ளி மாணவா்களுக்கு தொண்டு செய்து பழுத்த பழம், தந்தை பெரியாரும் தமிழ்ச் சமுதாயமும், தந்தை பெரியாரின் பகுத்தறிவுச் சிந்தனைகள், தந்தை பெரியாா் காண விரும்பிய உலக சமுதாயம், தந்தை பெரியாரும் பெண் விடுதலையும் ஆகிய தலைப்புகளிலும், கல்லூரி மாணவா்களுக்கு தந்தை பெரியாரும் பெண் விடுதலையும், தந்தை பெரியாரும் மூடநம்பிக்கை ஒழிப்பும், பெண் ஏன் அடிமையானாள்?, இனிவரும் உலகம், சமுதாய விஞ்ஞானி பெரியாா், உலகச் சிந்தனையாளா்களும் பெரியாரும் ஆகிய தலைப்புகளிலும் நடைபெறும்.