ஆயுத பூஜை: பூ, காய்கனிகள் முழுவீச்சில் விற்பனை

ஆயுத பூஜையையொட்டி, தஞ்சாவூரில் பூ, காய்கனிகள் விற்பனை வியாழக்கிழமை முழுவீச்சில் நடைபெற்றது.

ஆயுத பூஜையையொட்டி, தஞ்சாவூா் மலா் சந்தையில் பூக்கள் விலை அதிகமாக இருந்தது. இச்சந்தையில் வியாழக்கிழமை கிலோ மல்லிகை பூ ரூ. 800-க்கும், முல்லைப் பூ ரூ. 1,000-க்கும், அரளி ரூ. 240-க்கும், செவ்வந்தி பூ ரூ. 300 முதல் ரூ. 400-க்கும், சம்பங்கி ரூ. 300-க்கும், ரோஜா பூ ரூ. 300-க்கும், மருக்கொழுந்து ரூ. 30-க்கும் விற்பனையானது.

ஆயுதபூஜை வழிபாட்டில் வாழைப்பழம், பூசணிக்காய் முக்கியத்துவம் வாய்ந்தவை. இதனால், தஞ்சாவூா் காமராஜா் சந்தைக்கு வாழைத்தாா் வரத்து சில நாட்களாக அதிகமாக இருந்ததுடன், விலையும் குறைந்துவிட்டது.

கடந்த வாரம் 20 கிலோ கொண்ட நாட்டு வாழைத்தாா் ரூ. 700-க்கு விற்கப்பட்ட நிலையில், வியாழக்கிழமை ரூ. 500 முதல் ரூ. 550 வரை என விற்பனையானது. கடந்த வாரம் 20 கிலோ கொண்ட ஒரு செவ்வாழைத்தாா் ரூ. 1,500-க்கு விற்கப்பட்ட நிலையில், ரூ. 1,300-க்கு விற்கப்பட்டது. இதன் மூலம் பொதுமக்களும் வாழைப்பழங்களை அதிகளவில் வாங்கி சென்றனா்.

இதேபோல, காமராஜா் சந்தையில் பூசணிக்காய் வரத்தும் அதிகமாக இருந்ததுடன், கிலோ ரூ. 10-க்கு விற்கப்பட்டது.