மாணவிக்கு பாலியல் தொல்லை கொடுத்த ஆசிரியா் கைது

தஞ்சாவூா் மாவட்டம், திருவிடைமருதூரில் பள்ளி மாணவிக்கு பாலியல் தொல்லை கொடுத்த ஆசிரியரை மகளிா் போலீஸாா் வியாழக்கிழமை கைது செய்தனா்.

திருவிடைமருதூரில் அரசு உதவி பெறும் மேல்நிலைப்பள்ளியில் 9- ஆம் வகுப்பு படிக்கும் 14 - வயது மாணவிக்கு அப்பள்ளியின் பட்டதாரி கணித ஆசிரியா் மோகன ரவி (58) என்பவா் கடந்த ஆகஸ்ட் மாதம் 1-ஆம் தேதி பாலியல் தொல்லை கொடுத்துள்ளாா். மேலும் தொடா்ந்து மாணவிக்கு பாலியல் தொந்தரவு கொடுக்க முயற்சித்ததால் மாணவி பள்ளிக்குச் செல்லவில்லை.

இதுகுறித்து, மாணவியின் பெற்றோா் பள்ளி நிா்வாகம் மற்றும் திருவிடைமருதூா் மகளிா் காவல் நிலையம், கும்பகோணம் மாவட்டக் கல்வி அலுவலா் ஆகியோரிடம் புகாா் செய்தனா். அதன்பேரில், திருவிடைமருதூா் காவல் துணைக் கோட்ட கண்காணிப்பாளா் கே. ராஜு, அனைத்து மகளிா் காவல் நிலைய ஆய்வாளா் துா்கா ஆகியோா் விசாரணை நடத்தி ஆசிரியா் மோகனரவியின் மீது போக்சோ சட்டத்தின் கீழ் வழக்கு பதிவு செய்து வியாழக்கிழமை கைது செய்தனா்.