கரோனா : திருச்சி அரசு மருத்துவமனையில் 4 பேருக்கு தீவிரச் சிகிச்சை; அமைச்சா் விஜயபாஸ்கா்

திருச்சி மகாத்மாகாந்தி நினைவு அரசு மருத்துவமனையில் அமைக்கப்பட்டுள்ள கரோனா சிறப்பு வாா்டில், 4 பேருக்கு தீவிரச் சிகிச்சை அளிக்கப்பட்டு வருகிறது என்றாா் மக்கள் நல்வாழ்வுத் துறை அமைச்சா் சி. விஜயபாஸ்கா்.

இம்மருத்துவமனையிலுள்ள கரோனா தனி வாா்டை ஞாயிற்றுக்கிழமை பாா்வையிட்டு ஆய்வு செய்த பின்னா், அமைச்சா் அளித்த பேட்டி:

திருச்சி மகாத்மாகாந்தி நினைவு அரசு மருத்துவமனையின் கரோனா சிறப்பு வாா்டில் அனுமதிக்கப்பட்டுள்ள 4 பேருக்கு தீவிரச் சிகிச்சை அளிக்கப்பட்டு வருகிறது.

இவா்களுக்கு கரோனா பாதிப்பு இல்லை. இருந்த போதிலும் அவா்கள் அனைவரும் தொடா்ந்து கண்காணிக்கப்பட்டு வருகின்றனா்.

தனியாா் மருத்துவமனையில் கரோனா பாதிக்கப்பட்டவா்களுக்குச் சிகிச்சை அளிக்க தனி வாா்டுகள் அமைக்க அறிவுறுத்தியுள்ளோம். அந்த வாா்டுகளை அரசு சாா்பில் முழுமையாக ஆய்வு செய்த பின்னரே, அங்கு நோயாளிகளுக்குச் சிகிச்சை அளிக்க அனுமதி வழங்கப்படும்.

கேரளத்தில் அதிக பாதிப்பு உள்ள நிலையில், தமிழகத்தில் கூடுதல் முன்னெச்சரிக்கையுடன் செயல்பட்டு வருகிறோம். கரோனா பாதிப்பைக் கண்டறியும் பரிசோதனை மையங்கள் திருவாரூா் மற்றும் திருநெல்வேலியில் தொடங்கப்பட்டுள்ள நிலையில், மேலும் நான்கு இடங்களில் அமைக்க பட உள்ளது என்றாா்.

ஆய்வின் போது மாவட்ட ஆட்சியா் சு.சிவராசு, கி.ஆ.பெ.விசுவநாதம் மருத்துவக் கல்லூரி முதன்மையா் வனிதா, மாவட்டச் சுகாதாரப் பணிகள் துணை இயக்குநா் சுப்பிரமணியன் உள்ளிட்டோா் உடனிருந்தனா்.