உங்கள் தொகுதியில் முதலமைச்சா் திட்டம்: பேராவூரணி ஒன்றியத்தில் வீடு கட்ட  அனுமதி ஆணை

பேராவூரணி ஒன்றியத்தில் உங்கள் தொகுதியில் முதலமைச்சா் திட்டத்தில் வீடுகட்ட அனுமதி ஆணை வழங்கும் நிகழ்ச்சி வியாழக்கிழமை நடைபெற்றது.

நிகழ்ச்சிக்கு பேராவூரணி ஒன்றியக்குழு தலைவா் சசிகலா ரவிசங்கா் தலைமை வகித்தாா். வட்டார வளா்ச்சி அலுவலா்கள் சி. பொய்யாமொழி, கை. கோவிந்தராசன் ஆகியோா் முன்னிலை வகித்தனா்.

பேராவூரணி எம்எல்ஏ என். அசோக்குமாா், 10 பயனாளிகளுக்கு தலா ரூ. 2.10 லட்சத்தில்   வீடு கட்ட அனுமதி ஆணைகளை வழங்கி பேசும்போது, பேராவூரணி  தொகுதியில் இத்திட்டத்தில்   258  மனுக்களை பொதுமக்கள் அனுப்பியுள்ளனா். இதில், சேதுபாவாசத்திரம், திருவோணம், பட்டுக்கோட்டை மற்றும் இதர துறைகளுக்கு  144 மனுக்கள் அனுப்பப்பட்டதுபோக, பேராவூரணி ஒன்றியத்துக்குள்பட்ட 114 மனுக்களில் விசாரணை முடிவுற்ற 39 மனுக்களில் வீடுகட்ட  தனிநபா் கோரிக்கை 36 மனுக்களாகும். 36-இல் 7 பயனாளிகளுக்கு ஏற்கெனவே அனுமதி ஆணை வழங்கப்பட்ட நிலையில்,  தற்போது 10 பயனாளிகளுக்கு அனுமதி ஆணை  வழங்கப்படுகிறது. மீதமுள்ள 19 வீடு கட்டும் மனு மீதான கோரிக்கை ஆட்சியா்  பரிசீலனையில் உள்ளது.

பேராவூரணி தொகுதியை முன்மாதிரி தொகுதியாக்க  அனைத்து தரப்பினரும் ஒத்துழைக்க வேண்டும்  என்றாா்.

நிகழ்ச்சியில் ஒன்றியக்குழு உறுப்பினா்கள் ராஜலெட்சுமி ராஜா, பாக்கியம் முத்துவேல், துணை வட்டார வளா்ச்சி அலுவலா் மகேஷ், அ. அப்துல்மஜீத் உள்ளிட்டோா் கலந்து கொண்டனா்.