கல்லூரி மாணவிகள் வகுப்பு புறக்கணிப்பு

கோரிக்கைகளை வலியுறுத்தி, கடலூரில்  உள்ள தனியார் மகளிர் கல்லூரியில்  மாணவிகள் வகுப்புகளைப் புறக்கணித்து புதன்கிழமை போராட்டத்தில் ஈடுபட்டனர்.
தமிழகத்தில் அரசுப் பள்ளிகளை பாதுகாப்போம் என வலியுறுத்தியும், கல்லூரியில் அடிப்படை வசதிகள் செய்துதர வேண்டும், ஆசிரியர் பற்றாக்குறையைப் போக்க வேண்டும், அரசுப் பள்ளிகளை நோக்கி மாணவர்களை ஈர்ப்பதற்கான உள்கட்டமைப்பு வசதிகளை மேம்படுத்த போதிய நிதி ஒதுக்கீடு செய்ய வேண்டும், பல்கலைக்கழகங்களில் நடைபெறும் ஊழல்கள் தொடர்பாக உரிய நடவடிக்கை எடுக்க வேண்டும், விடுதி மாணவர்களுக்கான உணவுப் படியை அதிகரிக்க வேண்டும் என்பன உள்ளிட்ட கோரிக்கைகளை வலியுறுத்தி, தமிழகம் தழுவிய வகுப்புப் புறக்கணிப்பு போராட்டம் நடத்துவதாக இந்திய மாணவர் சங்கம் அறிவித்தது.  அதன்படி,கடலூரில்  உள்ள அரசு உதவி பெறும் தனியார் மகளிர் கல்லூரியில் புதன்கிழமை இந்திய மாணவர் சங்கத்தைச் சேர்ந்த மாணவிகள் வகுப்புகளைப் புறக்கணித்து, கோரிக்கைகளை வலியுறுத்தி ஆர்ப்பாட்டத்தில் ஈடுபட்டனர். போராட்டத்துக்கு சங்கத்தின் மாநிலக் குழு உறுப்பினர் கே.செம்மலர் தலைமை வகித்தார். மாவட்ட துணைச் செயலர் என்.நந்தினி, அருந்ததி உள்ளிட்டோர் கலந்து கொண்டனர்.