இடைநிலை ஆசிரியா் பணி தோ்வு: 849 போ் எழுதினா்

கடலூரில் மூன்று மையங்களில் இடைநிலை ஆசிரியா் பணியிடங்களுக்கான தோ்வு ஞாயிற்றுக்கிழமை நடைபெற்றது.

அரசு தொடக்கக் கல்வியில் காலியாக உள்ள 2,768 பணியிடங்கள் நிரப்பப்படும் என்று ஆசிரியா் தோ்வு வாரியம் அறிவித்திருந்தது. மேலும், இதற்கான தோ்வு ஜூலை 21-ஆம் தேதி நடத்தப்படும் எனவும் தெரிவித்திருந்தது.

கடலூா் மாவட்டத்தில் இந்தத் தோ்வை எழுத மொத்தம் 892 போ் விண்ணப்பித்திருந்த நிலையில், ஞாயிற்றுக்கிழமை நடைபெற்ற தோ்வில் 849 போ் மட்டுமே பங்கேற்றனா். 43 போ் தோ்வெழுத வரவில்லை. 3 தனியாா் பள்ளிகளில் தோ்வு மையங்கள் அமைக்கப்பட்டிருந்தன. தோ்வுப் பணியில் மூன்று தலைமையாசிரியா்கள் உள்ளிட்ட 65 ஆசிரியா்கள் ஈடுபடுத்தப்பட்டனா்.

கடலூா் மாவட்ட முதன்மைக் கல்வி அலுவலா் ஆா்.அறிவழகன் (கூடுதல் பொறுப்பு) தலைமையில், மாநில கல்வியியல் ஆராய்ச்சி மற்றும் பயிற்சி நிறுவனத்தின் துணை இயக்குநரும், மாவட்ட கண்காணிப்பு அதிகாரியுமான ஜி.சரஸ்வதி முன்னிலையில் தோ்வு நடைபெற்றது. விருத்தாசலம் மாவட்டக் கல்வி அலுவலா் (தொடக்கக் கல்வி) எஸ்.பி.சேகா் (பொ), கடலூா் மாவட்டக் கல்வி அலுவலா் (தனியாா் பள்ளிகள்) எஸ்.சாந்தி உடனிருந்தன்.

ஆட்சியா் ஆய்வு...: தோ்வு மையத்துக்கு மாவட்ட ஆட்சியா் சிபி ஆதித்யா செந்தில்குமாா் சென்று பாா்வையிட்டாா். உடன் பயிற்சி ஆட்சியா் ஆகாஷ் உடனிருந்தாா்.