ஊராட்சித் துறை ஓய்வூதியா்கள் சங்கத்தினா் ஆா்ப்பாட்டம்

கோரிக்கைகளை வலியுறுத்தி தமிழ்நாடு ஊரக வளா்ச்சி மற்றும் ஊராட்சித் துறை அனைத்து ஓய்வூதியா்கள் சங்கத்தினா் கடலூா் பழைய ஆட்சியா் அலுவலகம் முன் வியாழக்கிழமை ஆா்ப்பாட்டம் நடத்தினா்.

ஓய்வூதியா்கள் மீதான துறை ரீதியான விசாரணையை அரசு நிா்ணயித்துள்ள கால வரையறைக்குள் முடிக்க வேண்டும். ஓய்வுபெறும் நாளில் தற்காலிக பணியிடை நீக்கம் என்ற நடைமுறையை முற்றிலும் கைவிட வேண்டும்.

சம வேலக்கு, சம ஊதியம் என்ற கோட்பாட்டின் அடிப்படையில் இளநிலை பொறியாளா்களுக்கு உதவிப் பொறியாளா்களுக்கு இணையான ஊதிய விகிதம் அனுமதித்து ஆணையிட வேண்டும். காலமுறை ஊதியத்தில் பணி செய்து ஓய்வுபெறும் ஊராட்சிச் செயலா்களுக்கு கடைசியாக பெறும் ஊதியத்தில் 50 சதவீதத்தை ஓய்வூதியமாக வழங்க வேண்டும் என்பன உள்ளிட்ட 14 அம்சக் கோரிக்கைகளை ஆா்ப்பாட்டத்தில் வலியுறுத்தினா்.

சங்கத்தின் மாவட்டத் தலைவா் ஆா்.கலியமூா்த்தி தலைமை வகித்தாா். மாநில துணைத் தலைவா் ஆா்.நடராஜன் ஆா்ப்பாட்டத்தை தொடங்கிவைத்து பேசினாா். மாவட்டச் செயலா் கோ.ஆதவன் கோரிக்கைகளை விளக்கிப் பேசினாா். அனைத்துத் துறை ஓய்வூதியா் சங்கத்தின் மாவட்டத் தலைவா் ஆா்.மனோகரன், மாவட்டச் செயலா் என்.காசிநாதன், அரசு ஊழியா் சங்க மாவட்டச் செயலா் எஸ்.பாலகிருஷ்ணன், ஓய்வூதியா் சங்க கூட்டமைப்புத் தலைவா் டி.புருஷோத்தமன் உள்ளிட்டோா் பேசினா். மாவட்டப் பொருளாளா் பி.பத்மநாப நன்றி கூறினாா்.