சென்னை - கச்சிகுடா, சென்னை - டெராடூன்: ரயில் சேவையை புதுச்சேரி வரை நீட்டிக்க எம்.பி. வலியுறுத்தல்

சென்னை - கச்சிகுடா,  சென்னை - டெராடூன் ஆகிய விரைவு ரயில்களின் சேவையை புதுச்சேரி வரை நீட்டிக்க வேண்டும் என்று புதுவை மாநிலங்களவை உறுப்பினர் நா.கோகுலகிருஷ்ணன் வலியுறுத்தினார்.
இதுகுறித்து புதன்கிழமை அவர் வெளியிட்ட அறிக்கை: சென்னை - காக்கிநாடா - சர்கார் தினசரி விரைவு ரயில், சென்னை - கச்சிகுடா விரைவு ரயில், சென்னை - டேராடூன் விரைவு ரயில் ஆகியவற்றின் சேவைகளை புதுச்சேரிக்கும் விரிவுபடுத்த வேண்டும். 
இதுவரை மாற்றுப் பாதை இல்லாத காரணத்தால் இது சாத்தியம் இல்லாமல் இருந்தது. தொடர் வலியுறுத்தலுக்குப் பின்னர், சின்னபாபுசமுத்திரத்தை மாற்றுத் தடம் கொண்ட நிலையமாக எடுத்துக் கொள்ளலாம் என்றும், உடனடியாக வளவனூரை மாற்றுத் தடம் கொண்ட நிலையமாகச் செயல் திட்டத்தில் சேர்க்க நடவடிகை எடுக்கப்படும் என்று தெரிவிக்கப்பட்டது.
இந்த நிலையில், சென்னைக்கு திண்டிவனம் வழியாக புதிய ரயில் பாதைக்கான போக்குவரத்து ஆய்வுப் பணிகள் முடித்த நிலையில், இதை மத்திய ரயில்வே வாரியம் கைவிட்டதாகத் தெரிவிக்கப்பட்டது. இது அதிர்ச்சி அளிக்கும் செய்தியாகும். இதைக் கைவிடக் கூடாது. இதுகுறித்து, ரயில்வே வாரியம், ரயில்வே அமைச்சகத்திடம் வலியுறுத்தப்படும்.
புதுவையின் எதிர்கால ரயில் போக்குவரத்து தேவைகளைக் கருத்தில் கொண்டு பெருங்குடி - கடலூர் புதிய வழித் தடம் அமைக்கப்படும் போது, இரண்டு புதிய பராமரிப்புப் பாதைகள் அமைக்கப்படும் என்பது சற்று ஆறுதல் அளிக்கும் செய்தி என அந்த அறிக்கையில் கூறப்பட்டுள்ளது.