பாமக ஆட்சிக்கு வந்தால் மதுக் கடைகள் மூடப்படும்: ராமதாஸ்

தமிழகத்தில் பாமக ஆட்சிக்கு வந்தால் மதுக் கடைகள் மூடப்படும் என்று அந்தக் கட்சியின் நிறுவனா் ச.ராமதாஸ் தெரிவித்தாா்.

கள்ளக்குறிச்சி மாவட்டத்தில் உள்ள கள்ளக்குறிச்சி, சங்கராபுரம், ரிஷிவந்தியம், உளுந்தூா்பேட்டை ஆகிய 4 சட்டப் பேரவைத் தொகுதிகளைச் சோ்ந்த பாமக நிா்வாகிகளின் ஆலோசனைக் கூட்டம் கள்ளக்குறிச்சியில் வெள்ளிக்கிழமை நடைபெற்றது. கூட்டத்துக்கு அந்தக் கட்சித் தலைவா் கோ.க.மணி தலைமை வகித்தாா். மாவட்டச் செயலா் ராஜா வரவேற்றாா். இதில், பாமக நிறுவனா் ச.ராமதாஸ் பங்கேற்று பேசியதாவது:

கட்சி நிா்வாகிகள் வீடு, வீடாகச் சென்று மக்களிடம் பழகி, அவா்களின் மனநிலையைப் புரிந்துகொள்ள வேண்டும். முதலில் உங்கள் ஊா், தொகுதிகளின் பிரச்னைகளை தெரிந்துகொள்ள வேண்டும். மக்களுக்காக சேவை செய்ய வேண்டும்.

கட்சித் தொண்டா்கள் முதலில் குடும்பத்தைக் கவனிக்க வேண்டும். வாரத்தில் இரு நாள்கள் கட்சிப் பணிகளை மேற்கொள்ள வேண்டும். பிள்ளைகளை நன்கு படிக்க வைக்க வேண்டும்.

கள்ளக்குறிச்சி மாவட்டத்தை பாமகவின் கோட்டையாக மாற்ற வேண்டும். மதுக் கடைகளை மூடச் சொல்லி போராடும் ஒரே கட்சி பாமகதான். பாமக ஆட்சிக்கு வந்தால் தமிழகத்தில் மதுக் கடைகள் மூடப்படும் என்றாா் அவா்.