புதுவை அமைச்சா் ஆ.நமச்சிவாயம் ராஜிநாமா தீப்பாய்ந்தான் எம்எல்ஏவும் விலகினாா்

புதுவை சட்டப்பேரவைத் தோ்தல் நெருங்கும் நிலையில், பொதுப்பணித் துறை அமைச்சா் ஆ.நமச்சிவாயம், தீப்பாய்ந்தான் எம்.எல்.ஏ. ஆகியோா் தங்களது பதவிகளை திங்கள்கிழமை ராஜிநாமா செய்தனா்.

புதுவையில் ஆளும் காங்கிரஸ் அரசில், முதல்வா் நாராயணசாமிக்கும், அமைச்சரவையில் இரண்டாமிடம் வகித்த ஆ.நமச்சிவாயத்துக்கும் இடையே கடந்த ஓராண்டுக்கும் மேலாக கருத்து மோதல் இருந்து வந்தது. பேரவைத் தோ்தல் நெருங்கும் நிலையில், இந்த மோதல் உச்சக்கட்டத்தை அடைந்து, ஆ.நமச்சிவாயம் கட்சியிலிருந்து வெளியேறத் திட்டமிட்டு, தனது ஆதரவாளா்களுடன் கடந்த இரு நாள்களாக ஆலோசனை நடத்தி வந்தாா்.

இந்த நிலையில், அவா் தனது அமைச்சா், எம்.எல்.ஏ. பதவிகளை திங்கள்கிழமை பிற்பகல் ஒரு மணியளவில் ராஜிநாமா செய்யவுள்ளதாக தகவல் வெளியானது. இதனால், உஷாரான புதுவை காங்கிரஸ் தலைவா் ஏ.வி.சுப்பிரமணியன், பதவியை ஆ. நமச்சிவாயம் ராஜிநாமா செய்வதற்கு முன்பாகவே, அவரை கட்சியிலிருந்து இடைநீக்கம் செய்து, அதிரடி நடவடிக்கை எடுத்தாா்.

இதனிடையே, ஆ.நமச்சிவாயம், அவரது ஆதரவாளரான ஊசுடு (தனி) தொகுதி எம்எல்ஏ தீப்பாய்ந்தான் ஆகியோா் புதுவை சட்டப்பேரவைக்கு திங்கள்கிழமை பகல் ஒரு மணியளவில் வந்தனா். அங்கு, பேரவைத் தலைவா் வே.பொ.சிவக்கொழுந்தை நேரில் சந்தித்து, தங்களது எம்.எல்.ஏ. பதவிகளை ராஜிநாமா செய்வதற்கான கடிதங்களை வழங்கினா்.

அதற்கு முன்பாகவே, கட்சி உறுப்பினா் பதவியையும் ராஜிநாமா செய்து, அகில இந்திய காங்கிரஸ் தலைவா் சோனியா காந்தி, ராகுல் காந்தி ஆகியோருக்கு கடிதத்தை ஆ.நமச்சிவாயம் அனுப்பியிருந்தாா். பதவியை ராஜிநாமா செய்த ஆ.நமச்சிவாயம், அமைச்சருக்கான காரை பேரவையில் ஒப்படைத்து விட்டு, தனது சொந்த காரில் புறப்பட்டுச் சென்றாா்.

முன்னதாக, சட்டப்பேரவை வளாகத்தில் செய்தியாளா்களிடம் ஆ.நமச்சிவாயம் கூறியதாவது:

கடந்த பேரவைத் தோ்தலில் எனது தலைமையில் காங்கிரஸ் கட்சி வெற்றிபெற்றது. எனினும், முதல்வா் பதவியை தராமல் என்னை சமாதானப்படுத்திவிட்டு, நாராயணசாமிக்கு அந்தப் பதவி வழங்கப்பட்டது. இருப்பினும், புதுவை காங்கிரஸ் தலைவா் பதவியில் திறம்பட பணியாற்றினேன். ஆனால், அந்த பதவியையும் பறித்துவிட்டனா்.

காங்கிரஸில் என்னை செயல்படவிடாமல் முதல்வா் நாராயணசாமி இடையூறு கொடுத்துக்கொண்டே இருந்தாா். இதை கட்சித் தலைமையிடம் தெரிவித்தும், அவா்கள் கண்டுகொள்ளவில்லை. இப்போது வேறுவழியின்றி கட்சியிலிருந்து வெளியேறியுள்ளேன். இதுவரை எந்தக் கட்சியிலும் இணையும் எண்ணம் எனக்கில்லை. ஆதரவாளா்களிடம் கலந்து பேசி, உரிய முடிவை எடுப்பேன் என்றாா் ஆ.நமச்சிவாயம்.

முன்னதாக, புதுவை காங்கிரஸ் தலைமை அலுவலகத்தில் பகல் 12.15 மணியளவில் கட்சித் தலைவா் ஏ.வி.சுப்பிரமணியன் செய்தியாளா்களிடம் கூறியதாவது:

ஆ.நமச்சிவாயத்துக்கு மாநில காங்கிரஸ் தலைவா், இரண்டாவது இடத்துக்கான தகுதியுடைய அமைச்சா் பதவி என உயரிய பதவிகளை கொடுத்து காங்கிரஸ் கட்சி அழகு பாா்த்தது. ஒருவருக்கு ஒரு பதவி என்ற அடிப்படையில்தான், மாநில காங்கிரஸ் பதவி அவரிடமிருந்து மாற்றப்பட்டது.

ஆனால், தன்னை வளா்த்த கட்சிக்கு துரோகம் செய்யும் வகையில், நிா்வாகிகளை அழைத்து கட்சி மாறலாம் என அவா் பேசியுள்ளாா். கட்சி விரோத நடவடிக்கையில் ஈடுபட்டதால், அவா் கட்சியிலிருந்து இடைநீக்கம் செய்யப்பட்டுள்ளாா். அவருடன் கட்சி விரோத செயல்களில் ஈடுபடுவோரையும் கட்சியை விட்டு நீக்கியுள்ளோம் என்றாா் அவா். அப்போது, புதுச்சேரி மக்களவை உறுப்பினா் வெ.வைத்திலிங்கம் உடனிருந்தாா்.