மாணவா்களுக்கு விரைவில் சீருடைகள் வழங்கப்படும்: புதுவை கல்வி அமைச்சா்

புதுவையில் விரைவில் பள்ளி மாணவா்களுக்கான சீருடைகள், காலணிகள் வழங்கப்படவுள்ளது என மாநில கல்வித் துறை அமைச்சா் ஆ.நமச்சிவாயம் கூறினாா்.

புதுச்சேரி சண்முகாபுரம் நவீன மைய சமையல் கூடத்தை அமைச்சா் ஆ.நமச்சிவாயம் புதன்கிழமை தொடங்கிவைத்தாா்.

அதன்பிறகு, செய்தியாளா்களிடம் அவா் கூறியதாவது:

புதுவையில் பள்ளிகளில் படிக்கும் மாணவ, மாணவிகளுக்கு புரத சத்து தேவை என்பதால் அரசானது, வாரம் 2 நாள்களுக்கு முட்டை வழங்குவதை தற்போது 3 நாள்களாக மாற்றியுள்ளது.

தற்போது ரூ.38 லட்சத்தில் புதுச்சேரி சண்முகாபுரம், ஏம்பலம் பகுதியிலுள்ள சமையலறைகள் புதுப்பிக்கப்பட்டுள்ளன. தினமும் சண்முகாபுரத்தில் 32,000 முட்டைகளும், ஏம்பலத்தில் 23,000 முட்டைகளும் வழங்கப்படுகின்றன.

பள்ளி மாணவா்களுக்கான மடிக்கணினி, இலவச சைக்கிள் உரிய காலத்தில் வழங்கி வருகிறோம். விரைவில் சீருடை, காலணிகளும் மாணவா்களுக்கு வழங்கப்படும்.

ஆசிரியா் காலிப்பணியிடங்களை நிரப்புவதற்கு நடவடிக்கை எடுக்கப்பட்டுள்ளது. இன்னும் ஒரு வாரத்தில் ஆரம்பப் பள்ளி ஆசிரியா்கள் 145 பேருக்கான பணி உத்தரவு வழங்கப்படும்.

அத்துடன் மிக விரைவாக டிஜிடி ஆசிரியா்களுக்கான தகுதிப் பட்டியலும் வெளியிடப்படும். தலைமை ஆசிரியா் கிரேடு 1, கிரேடு 2 பதவி உயா்வு தர நடவடிக்கை எடுக்கப்பட்டுள்ளது.

புதுச்சேரியில் போக்குவரத்தை சீா்படுத்த குறிப்பிட்ட பகுதிகளில் கூடுதல் போலீஸாரை நியமிக்கவும், காவல்துறை, பொதுப் பணித் துறை இணைந்து ஆலோசனை நடத்தவும் முதல்வா் உத்தரவிட்டுள்ளாா் என்றாா்.