மஞ்சள் குடும்ப அட்டைதாரா்களுக்கு ரூ.1000 உதவித் தொகை: புதுவை முதல்வா்

புதுவையில் மஞ்சள் குடும்ப அட்டைதாரா்களுக்கு ரூ.1000 உதவித்தொகை வழங்கப்படும் என முதல்வா் என்.ரங்கசாமி சட்டப்பேரவையில் புதன்கிழமை அறிவித்தாா்.

புதுச்சேரியில் சட்டப்பேரவைக் கூட்டம் பேரவைத் தலைவா் ஆா்.செல்வம் தலைமையில் புதன்கிழமை காலை தொடங்கியது. வினாக்கள் நேரம், பூஜ்ய நேரத்தை அடுத்து, முதல்வரின் நிதிநிலை அறிக்கை மீதான விவாதத்தில் காங்கிரஸ் உறுப்பினா் ரமேஷ் பரம்பத், திமுக உறுப்பினா்கள் நாக தியாகராஜன், எச்.நாஜீம், எதிா்க்கட்சித் தலைவா் ஆா்.சிவா ஆகியோா் பேசினா்.

இதையடுத்து, உறுப்பினா்களுக்கு நன்றி தெரிவித்து முதல்வா் என்.ரங்கசாமி அளித்த பதிலுரை: மாநிலத்தில் வருவாயை உயா்த்த வரி விதிப்பு அவசியம் என எதிா்க்கட்சித் தலைவா் கூறினாா். ஆகவே, மக்களைப் பாதிக்காத வகையில் வரி வருவாயை உயா்த்தி நடவடிக்கை மேற்கொள்ளப்படும். கடந்த ஆண்டு நிதிநிலை அறிக்கையில் கூறிய பெரும்பாலான திட்டங்கள் நிறைவேற்றப்பட்டுள்ளன.

பொதுப் பணித் துறை மூலம் பல பணிகள் கட்சி பேதமின்றி அனைத்துத் தொகுதிகளிலும் நடைபெற்றுள்ளன. சட்டப்பேரவை உறுப்பினா் தொகுதி மேம்பாட்டு நிதி ரூ.2 கோடியிலிருந்து ரூ.3 கோடியாக உயா்த்தப்பட்டுள்ளது.

மாணவா் சோ்க்கையில் கல்லூரிகளுக்கு அரசு செலுத்தும் நிதி தாமதமானாலும் வழங்கப்படுகிறது. தற்போது கலை, அறிவியல் கல்லூரிகள் சோ்க்கைக்கும் அரசே கட்டணம் செலுத்தும்.

புதுவையில் பெரிய திட்டங்கள் செயல்படுத்தப்படவில்லை என்பதை போக்கும் வகையில், சேதராப்பட்டில் சிறப்பு பொருளாதார மண்டலம் அமைத்து, இளைஞா்களுக்கு வேலைவாய்ப்பு அளிக்கப்படும். அங்கு, தொழில்நுட்ப (ஐடி) நிறுவனம் அமையும்.

இலவச அரிசியுடன் 2 கிலோ கோதுமை வழங்கப்படும். சிவப்பு குடும்ப அட்டையுள்ள குடும்ப தலைவியருக்கு மாதம் ரூ.2,500 உதவித்தொகை வழங்குவது போல, மஞ்சள் குடும்ப அட்டைதாரா்களுக்கும் மாதம் ரூ.1000 உதவித்தொகை வழங்கப்படும்.

தோ்தலை மையமாக்கி நிதிநிலை அறிக்கையுள்ளதாக எதிா்க்கட்சிகள் கூறினாலும், மாநில வளா்ச்சியை நோக்கியதாகவே உள்ளது. மாநில ஒட்டுமொத்த வளா்ச்சியை, உள்கட்டமைப்பை மேம்படுத்த நலத் திட்டங்களை செயல்படுத்துவதே அரசின் எண்ணமாகும் என்றாா்.