குண்டர் சட்டத்தில் சாராய வியாபாரி கைது

சங்கராபுரம் அருகே சாராய வியாபாரியை குண்டர் தடுப்புச் சட்டத்தின் கீழ் போலீஸார் ஞாயிற்றுக்கிழமை கைது செய்தனர்.
விழுப்புரம் மாவட்டம், சங்கராபுரம் அருகேயுள்ள குறும்பலூர் கிராமத்தைச் சேர்ந்த அண்ணாமலை மகன் ஏழுமலை (34). இவர், அந்தப் பகுதியில் சாராய விற்பனை மற்றும் மதுக் கடத்தலில் ஈடுபட்டு வந்துள்ளார். இது தொடர்பாக கள்ளக்குறிச்சி மதுவிலக்கு போலீஸார் அவரை கைது செய்து கடலூர் மத்திய சிறையில் அடைத்தனர்.
தொடர்ந்து, இதுபோன்ற சட்டவிரோதச் செயல்களில் ஏழுமலை ஈடுபடுவதைத் தடுக்க குண்டர் சட்டத்தின் கீழ் கைது செய்ய மாவட்ட ஆட்சியர் இல.சுப்பிரமணியன் உத்தரவிட்டார். 
இதைத் தொடர்ந்து, கடலூர் மத்திய சிறையில் விசாரணைக் கைதியாக இருந்து வந்த ஏழுமலையை குண்டர் தடுப்புச் சட்டத்தின் கீழ் போலீஸார் ஞாயிற்றுக்கிழமை கைது செய்தனர்.