புதுவை அரசுப் பேருந்து மீது கல் வீசித் தாக்குதல்: தனியார் பேருந்து ஊழியர்கள் 5 பேர் கைது

விழுப்புரம் மாவட்டம், பொம்மையார்பாளையம் அருகே புதுவை அரசுப் பேருந்து மீது கற்களை வீசித் தாக்கிவிட்டு தப்பியோடிய 5 பேரை போலீஸார் கைது செய்தனர்.
புதுச்சேரி பேருந்து நிலையத்திலிருந்து காலாப்பட்டு வரை செல்லும் புதுவை மாநில அரசுப் பேருந்து வெள்ளிக்கிழமை இரவு வழக்கம்போல காலாப்பட்டு 
சென்றுவிட்டு, புதுச்சேரிக்கு திரும்பிக் கொண்டிருந்தது.
அப்போது, இடையே தமிழகப் பகுதியான விழுப்புரம் மாவட்டம், பொம்மையார்பாளையம் அருகே பேருந்து சென்றபோது, சாலையோரம் மறைந்திருந்த சிலர் பேருந்து மீது கற்களை வீசித் தாக்கிவிட்டு தப்பியோடிவிட்டனர். இதில், அரசுப் பேருந்தின் கண்ணாடிகள் உடைந்தன. ஓட்டுநர் காத்தவராயன் உடனடியாக பேருந்தை நிறுத்தியதால், விபத்து தவிர்க்கப்பட்டது.
இந்தச் சம்பவம் குறித்து பேருந்தின் நடத்துநரான புதுவை கொம்பாக்கம் பகுதியைச் சேர்ந்த பிரகாஷ் அளித்த புகாரின்பேரில், ஆரோவில் போலீஸார் சம்பவ இடத்துக்கு வந்து விசாரணை நடத்தினர்.
அங்கிருந்த சந்தேக நபரைப் பிடித்து விசாரித்தபோது, புதுச்சேரியிலிருந்து இயக்கப்பட்டு வரும் அரசுப் பேருந்து ஊழியர்களுக்கும், அதே தடத்தில் இயக்கப்பட்ட புதுச்சேரி தனியார் பேருந்து ஓட்டுநர், நடத்துநர்களுக்கும் இடையே பேருந்துகளை உரிய நேரத்தில் இயக்குவது தொடர்பாக முன்விரோதம் இருந்ததும், அதன் காரணமாக விரக்தியிலிருந்த தனியார் பேருந்து ஊழியர்கள், அரசுப் பேருந்தின் மீது கற்களை வீசித் தாக்கிவிட்டு தப்பியதும் தெரியவந்தது.
இதையடுத்து, புதுச்சேரி தனியார் பேருந்து ஓட்டுநரான கோட்டக்குப்பத்தைச் சேர்ந்த சந்திரசேகர் (38), நடத்துநர் கார்த்திகேயன் (29), புதுச்சேரி காலாப்பட்டைச் சேர்ந்த பேருந்து உதவியாளர் சௌந்தர் (25), புதுவை சேந்தநத்தத்தைச் சேர்ந்த ஜாகீர்உசேன் (30) மற்றும் 17 வயது சிறுவன் ஆகியோரை போலீஸார் சனிக்கிழமை கைது செய்தனர்.