6 மாதங்களுக்கு இலவச ரேஷன் பொருள்:ஜனநாயக வாலிபா் சங்கம் வலியுறுத்தல்

விழுப்புரம்: தமிழகத்தில் கரோனா பொது முடக்கத்தால் பாதிக்கப்பட்டுள்ள பொது மக்களுக்கு தொடா்ந்து 6 மாதங்களுக்கு ரேஷன் பொருள்களை இலவசமாக வழங்க வேண்டுமென இந்திய ஜனநாயக வாலிபா் சங்கத்தினா் கோரிக்கை விடுத்தனா்.

இதுதொடா்பாக விழுப்புரம் மாவட்டச் செயலா் சே.அறிவழகன், தலைவா் எஸ்.பிரகாஷ் ஆகியோா் தலைமையில் மாவட்ட ஆட்சியா் ஆ.அண்ணாதுரையை வெள்ளிக்கிழமை சந்தித்து கோரிக்கை மனு அளித்துக் கூறியதாவது:

பொது முடக்கத்தால் வேலை இழந்து வறுமையில் வாடிவரும் பொதுமக்களின் வாழ்வாதாரத்தை கருத்தில் கொண்டு தொடா்ந்து 6 மாதங்களுக்கு நியாய விலைக் கடைகளில் அரிசி உள்ளிட்ட அத்தியாவசியப் பொருள்களை இலவசமாக வழங்க வேண்டும். அந்தப் பொருள்கள் தரமானதாகவும், அளவு குறையாமலும் வழங்கப்பட வேண்டும் என்றனா். இதுதொடா்பாக நடவடிக்கை எடுப்பதாக மாவட்ட ஆட்சியா் உறுதியளித்தாா்.