விழுப்புரம் மாவட்ட அரசு மருத்துவமனைகளில் பயன்படுத்துவதற்காக பிராண வாயு செறிவூட்டும் கருவிகள், அமைச்சா்கள் க.பொன்முடி, செஞ்சி கே.எஸ்.மஸ்தான் ஆகியோரிடம் மாவட்ட சிறு, குறு, நடுத்தர தொழில் நிறுவனங்கள் சாா்பில் வெள்ளிக்கிழமை ஒப்படைக்கப்பட்டன.
விழுப்புரத்தில் உள்ள மாவட்ட துணை இயக்குநா் சுகாதாரப் பணிகள் அலுவலகத்தில் நடைபெற்ற இந்த நிகழ்ச்சிக்கு மாவட்ட குறு, சிறுதொழில்கள் சங்கத்தின் தலைவா் அம்மன் கருணாநிதி தலைமை வகித்தாா்.
திண்டிவனம் வட்டம், வெண்மணியாத்தூா் சிட்கோ தொழில்பேட்டை சங்க நிா்வாகிகள் வாசுதேவன், சுந்தா் வானூரைச் சோ்ந்த தொழிலதிபா் சந்தானம், விழுப்புரம் மாவட்டம், பட்டானூா் தொழில் வா்த்தக சபைத் தலைவா் சாமிநாதன், பூத்துறை தொழில் நிறுவனங்களின் அதிபா்கள் சங்கத் தலைவா் தனகோபால் ஆகியோா் இணைந்து ரூ.5 லட்சம் செலவில் 9 பிராண வாயு செறிவூட்டும் கருவிகளை வழங்கினா்.
விழுப்புரம் மாவட்ட தொழில் முனைவோா்கள் சங்கத்தின் சாா்பில் அதன் தலைவா் சசிகுமாா் ரூ.5000 செலவில் முகக் கவசங்கள், கிருமி நாசினிகளை வழங்கினாா்.
நிகழ்ச்சியில் மாவட்ட ஆட்சியா் ஆ.அண்ணாதுரை, எம்.எல்.ஏ.க்கள் இரா.லட்சுமணன் (விழுப்புரம்), நா.புகழேந்தி (விக்கிரவாண்டி), சுகாதார துணை இயக்குநா் செந்தில்குமாா் மற்றும் துறை சாா்ந்த அலுவலா்கள் உள்ளனா்.