விழுப்புரத்துக்கு தாமதமாக வந்த செந்தூா் விரைவு ரயில்

சென்னை எழும்பூரிலிருந்து திருச்செந்தூா் செல்லும் செந்தூா் விரைவு ரயில் வியாழக்கிழமை ஒரு மணி நேரம் தாமதமாக விழுப்புரம் வந்தடைந்தது.

சென்னை எழும்பூரிலிருந்து திருச்செந்தூருக்கு வழக்கமாக மாலை 4 மணிக்குப் புறப்பட வேண்டிய செந்தூா் விரைவு ரயில் வியாழக்கிழமை மாலை புறப்படத் தயாராக இருந்தது.

அப்போது ரயில் இயந்திரத்தில் கோளாறு ஏற்பட்டிருப்பது தெரிய வந்தது. இதையடுத்து ரயில்வே அலுவலா்கள், ஊழியா்கள் விரைந்து சென்று கோளாறை சரி செய்தனா். இதன் காரணமாக மாலை 5 மணிக்கு சென்னை எழும்பூரிலிருந்து விரைவு ரயில் புறப்பட்டது.

இந்நிலையில், விழுப்புரத்துக்கு மாலை 6.45 மணிக்கு வர வேண்டிய செந்தூா் விரைவு ரயில் வியாழக்கிழமை இரவு 7.45 மணிக்கு வந்தடைந்தது. சுமாா் 5 நிமிஷங்களுக்குப் பிறகு இந்த ரயில் புறப்பட்டது. ரயில் தாமதம் காரணமாக பொதுமக்கள் அவதிப்பட்டனா்.