‘என் கனவு-என் எதிா்காலம்’ திட்டம்: திண்டிவனத்தில் முதல்வா் நாளை தொடங்கிவைக்கிறாா்

விழுப்புரம்: விழுப்புரம் மாவட்டம், திண்டிவனம் பகுதியில் புதன்கிழமை (பிப்.4) நடைபெறும் அரசு விழாவில் ‘என் கனவு- என் எதிா்காலம்’ என்ற திட்டத்தை தமிழக முதல்வா் மு.க.ஸ்டாலின் தொடங்கி வைக்கிறாா்.

தமிழகம் முழுவதும் 2025, ஜூலை மாதத்தில் தொடங்கப்பட்ட ‘உங்களுடன் ஸ்டாலின் முகாம்’ தொடா்ந்து பல்வேறு பகுதிகளில் நடத்தப்பட்டது. மொத்தமாக 10 ஆயிரம் முகாம்கள் நடத்தப்பட்ட நிலையில், அந்த முகாம்களில் பெறப்பட்ட மனுக்கள் அடிப்படையில் 1.80 லட்சம் பயனாளிகளுக்கு சமூகப் பாதுகாப்புத் திட்டப் பயன்கள் வழங்கும் விழா, ‘என் கனவு -என் எதிா்காலம்’ இணையதளத் தொடக்க விழா மற்றும் விழுப்புரம் மாவட்டத்தில் முடிவுற்ற பணிகள் தொடக்க விழா மற்றும் புதிய திட்டங்களுக்கு அடிக்கல் நாட்டு விழா புதன்கிழமை (பிப்.4) நடைபெறவுள்ளது.

திண்டிவனம்-செஞ்சி சாலையில், கொள்ளாா் கிராமத்திலுள்ள சிப்காட் வளாகத்தில் நடைபெறும் விழாவில் முதல்வா் மு.க.ஸ்டாலின் பங்கேற்று, நலத்திட்டப் பயன்களையும், சமூகப் பாதுகாப்புத் திட்டப் பயன்களையும் வழங்கி, ‘என் கனவு -என் எதிா்காலம்’ என்ற திட்டத்தில் இளைஞா்களின் கனவுகளைப் பதிவு செய்ய உருவாக்கப்பட்டுள்ள இணையதளத்தைத் தொடங்கி வைத்து உரையாற்றுகிறாா்.

இதைத் தொடா்ந்து ‘உங்களுடன் ஸ்டாலின்’ திட்டம் மற்றும் சமூகப் பாதுகாப்புத் திட்டத்தின் கீழ் பயனாளிகளுக்கு நல உதவிகளை முதல்வா் வழங்கவுள்ளாா்.

விழாவில் பங்கேற்பதற்காக சென்னையிலிருந்து புதன்கிழமை காலை புறப்பட்டு வரும் தமிழக முதல்வா் மு.க.ஸ்டாலினுக்கு விழுப்புரம் மாவட்ட எல்லையில் திமுக சாா்பில் வரவேற்பு அளிக்கப்படுகிறது. இந்த வரவேற்பைத் தொடா்ந்து திண்டிவனம் தீா்த்தகுளத்திலிருந்து செஞ்சி சாலை காந்தியாா் திடல் வரை சாலை வலத்தை மேற்கொள்ளும் முதல்வா் மு.க.ஸ்டாலின் விழா நடைபெறும் பகுதியைச்சென்றடையவுள்ளாா். அரசு விழா முடிந்த பின்னா் சாலை மாா்க்கமாக மீண்டும் சென்னைக்கு முதல்வா் புறப்பட்டுச் செல்கிறாா்.

முதல்வா் வருகையொட்டி விழா நடைபெறும் பகுதி, திண்டிவனம் பகுதிகள், முதல்வா் வரும் வழித்தடப் பகுதிகளில் ஆயிரத்துக்கும் மேற்பட்ட போலீஸாா் பாதுகாப்புப்பணியில் ஈடுபடுத்தப்பட்டுள்ளனா்.